Bu yazıçılar qələbəmizi gözdən salan əsərlər yazırlar- İDDİA

Sovet dönəmində kitab nəşrinin müəyyən ciddi senzurası da var idi. Hər istəyən kitab dərc etdirə bilmirdi. Kitabı çıxan adama böyük hörmət var idi, kitabda yazılan hər şey mütləq həqiqət kimi qəbul olunurdu. İndi hər istəyən kitabını çap etdirir, amma keyfiyyət və məhsulun satışı məsələsi sual doğurur. Bu mənada kitab dərcinə hansısa senzura tətbiq edilməlidir?

Lent.az-ın sualını cavablandıran yazıçı Azər Qismət senzuranın əleyhinə olduğunu desə də, milli təhlükəsizlik məsələləri naminə bəzi nəzarət və tövsiyələrin vacibliyini qeyd edib.

“Son dövrlər xaricdən maliyyələşən və ya hansısa maliyyə maraqları olan bəzi yazıçılarda müəyyən meyllər hiss olunur. Xaricdən tezislər alırlar. Qələbəmizi gözdən salan əsərlər yazırlar. Milli-mənəvi dəyərlərimizi təhqir edən bədii əsərlər ortaya qoyulur. Bunu fikir müxtəlifliyi adı altında xalqa sırımağa çalışırlar. Belə məsələlərə nəzarət olmalıdır. Bu milli təhlükəsizlik məsləsidir. Senzura yalnız bu mənada ola bilər. Əsərlərində söyüşə, jarqonlara, açıq-saçıq ifadələrə çox yer verən yazıçıya isə nəşriyyat müəyyən tövsiyələr verə bilər. Əsərində bəsitliyə, vulqarlığa yol verən yazıçı sadəcə öz nüfuzuna xələl gətirə bilər”,- deyə o bildirib.