Həvəskar rəssamlar və xalq tətbiqi sənəti ustaları mükafatlandırıldılar

Lent.az-ın məlumatına görə, sərgini giriş sözü ilə mədəniyyət və turizm nazirinin müavini Sevda Məmmədəliyeva açıb. O bildirib ki, ilk belə sərgi 2008-ci ildə təşkil edilib. İkinci dəfə baş tutan bu sərginin təşkilatçısı Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzidir.
Nazir müavini sərgidə 70-dən çox müəllifin 300-ə yaxın müxtəlif janrda əl işlərinin nümayiş olunduğunu deyib. Qeyd edib ki, sərgidə rəngkarlıq və qrafika əsərləri ilə yanaşı heykəltəraşlıq, xalçaçılıq, zərgərlik, naqqaşlıq, dulusçuluq, bədii tikmə və digər tətbiqi sənət nümunələrinə geniş yer ayrılıb.

Daha sonra Sevda Məmmədəliyeva beş nominasiya üzrə keçirilən sərgi-müsabiqənin qaliblərinin adlarını açıqlayıb. Görkəmli rəssamlardan ibarət münsiflər heyətinin qərarına əsasən müəyyənləşən qaliblərə 1-ci, 2-ci və 3-cü dərəcəli diplomlar, pul mükafatları verilib. Bir neçə nəfərə isə həvəsləndirici mükafat və diplom təqdim olunub.
Qeyd edək ki, sərgi iki gün davam edəcək.
Xəyalə