Mənsum İbrahimovun yubileyi Gəncədə qeyd edilib

Mənsum İbrahimovun Lent.az-a verdiyi məlumata görə, tədbir Gəncə şəhər İcra Hakimiyyəti və Gəncə Dövlət Universiteti tərəfindən təşkil olunub.

Bakıdan gedən qonaqlar sırasında Milli Konservatoriyanın rektoru Siyavuş Kərimi, Arif Babayev, Aygün Bayramova, Təyyar Bayramov, Aytən Məhərrəmova, Elməddin İbrahimli, Elçin Həşimov, Elnur Əhmədov, Kamran Kərimov və Tural Abbasov olub. Mənsum İbrahimovun sözlərinə görə, nümayəndə heyəti ilk olaraq Nizaminin məqbərəsini ziyarət edib. Bundan başqa Gəncə Dövlət Universitetində də görüş olub. Daha sonra isə yubiley tədbiri keçirilib: “Tədbir Yeni Azərbaycan Partiyasının Gəncə şəhər təşkilatının binasında baş tutdu. 700 nəfərlik salon gəncəlilər tərəfindən dolmuşdu. Tədbir çox maraqlı keçdi. İlk olaraq mənə həsr olunmuş 18 dəqiqəlik film göstərildi. Müxtəlif çıxışlar, ifalar oldu. Gəncənin azyaşlı uşaqlarının oxuduğu “Qarabağ şikəstəsi” də yaddaqalan idi”.

Tədbirin son ifası isə yubilyarın özünə məxsus olub. Mənsum İbrahimovun çıxışı böyük maraqla qarşılanıb.

Xanəndə onu da bildirib ki, növbəti yubiley tədbiri Milli Konservatoriya və Teatr Xadimləri İttifaqının birgə təşkilatçılığı ilə keçiriləcək.

Xəyalə Muradlı