Elariz: “Bizim işimiz yemək bişirmək deyil, oxumaqdır”

Müğənni efirdə qadağa ilə üzləşməsi barədə deyilənlərə aydınlıq gətirdi
Azərbaycanın bəzi televiziya kanallarında müğənni Elarizə qadağa qoyulması barədə xəbərlər yayılıb. Səbəb kimi isə onun bir neçə televiziya proqramında iştirak etməkdən imtina etməsi göstərilib. Müğənni xəbərlə bağlı Lent.az-a münasibət bildirib: “Məni gözü götürməyənlər hər an haqqımda yalan xəbərlər uydurub, karyerama əngəl törətməyə çalışırlar. Mənə heç bir telekanalda qadağa qoymayıblar. Ölkəmizdə fəaliyyət göstərilən hər bir telekanalın qapısı həmişə üzümə açıq olub və belə də davam edir. Mənim bütün telekanallarımıza və onların əməkdaşlarına hörmətim sonsuzdur. Çünki hər birində həmişə məni hörmətlə qarşılayıb, eyni tərzdə də uğurlayırlar”.
Müğənni özü xəbərin haradan qaynaqlanmasına aydınlıq gətirib: “Bir neçə telekanalımızda mətbəx, yemək bişirmək mövzusunda proqramlar var. Mən də o proqramlarda iştirak etmək üçün dəfələrlə dəvət almışam. Amma o səpkili verilişlərdə iştirak etmək mənə görə olmadığından həmişə imtina edirəm. Çünki mənim fikrimcə, müğənni efirdə mətbəx mövzusunda danışmamalı, yemək bişirməklə məşğul olmamalıdır. Bu iş kulinarlara, aşbazlara məxsusdur. Bizim işimiz oxumaq, sənətimiz haqda danışmaqdır. Üstəlik, mən yemək bişirə bilmədiyim halda, reklam olunmaq xatirinə o səpkili verilişlərdə görünmək istəmirəm. Axı aşbaz deyiləm. Məhz o cür verilişlərdə iştirak etməkdən imtina etdiyim üçün bəzi üzdəniraq həmkarlarım hər şeyi tərsinə yozaraq, mənim haqqımda telekanallarımızda qadağa söz-söhbətini yaradırlar. Axı məni hansısa kanalda görünməməyim onlar üçün əlverişlidir. Çünki həm özümü, həm də sənətimi gözləri götürmür. Halbuki, mənim haqqımda böyük sənətkarlar daim yüksək fikirlər söyləyirlər”.
Elariz atmacasız da ötüşməyib: “O cür verilişlərdə iştirak edən bir neçə sənət nümayəndələrimiz var ki, özlərini çox yaxşı, səviyyəli apara bilirlər. Bəziləri isə necə səviyyəsiz olduqlarını bir daha orada sübut edirlər. Onlara yazığım gəlir. Hətta çoxu o verilişlərdən sonra gözdən düşüb. Məsləhət görürəm ki, heç olmasa efir xatirinə davranışlarına diqqət yetirib sevgi, hörmət qazansınlar, ya da özlərini gözdən salıb, qazandıqları hörməti də itirməsinlər. Pula, hər hansı hədiyyəyə görə adam özünü efirdə bu qədər rəzil etməz”.
Lalə Yusifqızı