Türkiyə yığması zərbə üstünə zərbə aldı - FOTO
09 oktyabr 2010 13:27 (UTC +04:00)

Türkiyə yığması zərbə üstünə zərbə aldı - FOTO

Lent.az-ın “Habertürk”ə istinadən verdiyi məlumata görə, 0:3 hesablı məğlubiyyətə düçar olan “ay-ulduzlular”ın iki futbolçusu da zədələnib.

24-cü dəqiqədə Mehmet Aurelio sol ayaq əzələsindən xəsarət alıb. Nəticədə o, yerini Tuncay Şanlıya verməli olub. Aurelio yığmanın düşərgəsini də tərk edərək, İstanbula qayıdıb. Onun zədəsinin ciddilik dərəcəsinə rentgen müayinəsindən sonra aydınlıq gələcək.


Bundan əlavə, epizodların birində Bundestimin qapıçısı Manuel Noyerlə toqquşan Sərvət Çətin də almacıq sümüyünün qırılma ehtimalı ilə xəstəxanaya çatdırılıb. Əslən azərbaycanlı müdafiəçinin oktyabrın 12-də Bakıda Azərbaycan millisinə qarşı matçda iştirakı böyük sual altındadır.


Almaniya ilə oyun ərəfəsində isə Arda Turan qasıq nahiyəsindəki ağrılarının güclənməsi ilə əlaqədar heyətdən çıxarılıb. Beləliklə, Türkiyə millisinin bu gün ölkəmizə Arda və Aurelio itkisi ilə gələcəyi dəqiqdir. Amma Sərvətin durumuna hələ aydınlıq gəlməyib.


Qeyd edək ki, Tofiq Bəhramov adına Respublika stadionunda keçiriləcək Azərbaycan – Türkiyə matçı saat 20:00-da başlanacaq. Hər iki yığma bu qarşılaşma öncəsi 0:3 hesabı ilə uduzub. Türkiyə Berlində Almaniyaya, Azərbaycan isə Vyanada Avstriyaya yenilib.
# 420

Oxşar yazılar