Ermənistanda bütün hakimlər çempionatdan qovuldu

Lent.az-ın FFA-nın rəsmi saytına istinadən verdiyi məlumata görə, bu haqda qərar Ayrapetyanın klub prezidentləri ilə görüşündə çıxarılıb.

Federasiya prezidenti yüksək liqadakı hakimliyin səviyyəsindən narazı olduğunu bildirib. Məhz bu səbəbdən, bütün hakimlərin xidmətlərindən imtina edilməsi məqsədəuyğun sayılıb. Ayrapetyan matçların idarəçiliyini uşaq-gənclər birinciliklərindəki hakimlərə etibar etmək təklifini verib. O, gənc hakimlər üçün uğurlu karyera qurmaq baxımından bu qərarın əhəmiyyətini vurğulayıb. FFA başçısı əcnəbi hakimlərin xidmətindən də yararlanmağı məqsədəuyğun sayıb. Klub rəhbərləri istisnasız olaraq, bu layihəni dəstəkləyiblər.

Qeyd edək ki, Ermənistan çempionatında son zamanlar hakimlikdən narazılıqlar tez-tez səsləndirilir. Son bir ayda 4 qarşılaşmada hakimlərin kobud səhvləri qeydə alınıb.