Kamran Əsədov barəsindəki məhkəmə hökmündən narazıdır

Radikal dini qruplaşmanın bir sıra üzvləri barələrindəki məhkəmə hökmündən apellyasiya şikayəti veriblər

Radikal dini qruplaşma yaradıb, bir sıra cinayətlərdə təqsirli bilinərək həbs edilən Azərbaycan Ordusunun keçmiş zabiti Kamran Əsədov və digər şəxslər barəsində məhkəmə qərarından apellyasiya şikayəti verilib.

Bakı Apellyasiya Məhkəməsindən APA-ya verilən məlumata görə, təqsirləndirilənlərdən Ramin və Tərlan Kərimov qardaşları, Şirvani Babayev, İlkin İsmayılov, Orxan Əlizadə, Kamran Babayev, Samir Əliyev, Azər İbadov, Ramin Cəlilov, Fərid Cabbarov, Elşən Məmmədov və Bəxtiyar Orucov barəsində Ağır Cinayətlərə Dair İşlər üzrə Hərbi Məhkəmənin hökmündən şikayət olunub. Apelyasiya məhkəməsinin vaxtı və işə baxacaq hakim isə hələ müəyyənləşməyib. Təqsirləndirilənlər Kamran Əsədov, Samir Mehrəliyev, Edqar Əliyev, Yaşar və Şəhriyar Məhərrəmov qardaşları, Hacıbala Hüseynov, Rövşən Əbdüləliyev və Vüqar Əliyev barəsində çıxarılan hökmdən isə apellyasiya şikayəti verilməyib.

Qeyd edək ki, məhkəmənin hökmü ilə Kamran Əsədov 15 il, Bəxtiyar Orucov 15 il, Fərid Cabbarov 15 il, Elşən Məmmədov 14 il, Kamran Babayev 15 il, Samir Mehrəliyev 15 il, Tərlan Kərimov 13 il, Edqar Əliyev 6 il 6 ay, Ramil Kərimov 12 il, Şirvani Babayev 10 il, Samir Əliyev 12 il, Yaşar Məhərrəmov 12 il 6 ay, Orxan Əlizadə 10 il 6 ay, Hacıbala Hüseynov 6 il 3 ay, Azər İbadov 10 il, Şəhriyar Məhərrəmov 2 il, Ramin Cəlilov 11 il, Rövşən Əbdüləliyev 12 il 6 ay, İlkin İsmayılov ümumilikdə 18 il, Vüqar Əliyev 14 il müddətinə azadlıqdan məhrum ediliblər. Məhkəmə, həmçinin, Kamran Əsədovun leytenant rütbəsinin geri alınması barədə Müdafiə Nazirliyinə müraciət olunması haqda da qətnamə qəbul edib.

Xatırladaq ki, təqsirləndirilən şəxslər - Kamran Əsədov, Bəxtiyar Orucov, Fərid Cabbarov, Elşən Məmmədov, Kamran Babayev, Samir Mehrəliyev, Tərlan Kərimov, Edqar Əliyev, Ramil Kərimov, Şirvani Babayev, Samir Əliyev, Yaşar Məhərrəmov, Orxan Əlizadə, Hacıbala Hüseynov, Azər İbadov, Şəhriyar Məhərrəmov, Ramin Cəlilov, Rövşən Əbdüləliyev, İlkin İsmayılov və Vüqar Əliyev dini radikal qrupda birləşərək, hərbi mübarizəyə başlamağa cəhd etməkdə, Bakıdakı “LUKoyl” yanacaqdoldurma məntəqəsinə silahlı basqın etməkdə, ABŞ və Böyük Britaniyanın Azərbaycandakı səfirliklərinə qarşı terror aktı hazırlamaqda ittiham olunurlar.