AZAL-ın kassa şəbəkəsində kompüter sistemi sıradan çıxıb

Bu gün səhər saatlarında «Azərbaycan Hava Yolları» QSC-nin kassa şəbəkəsində kompüter sistemi sıradan çıxdığından bilet satışı dayanıb.

«APA-ECONOMICS»in məlumatına görə, saat 16:00-dək AZAL-ın kassaları bilet satışını həyata keçirməyib. Sərnişinlərə bildirilib ki, mərkəzləşdirilmiş kompüter şəbəkəsində baş verən problem nəticəsində boş yerlər və bron yerlər barədə məlumatları müəyyənləşdirmək mümkün olmadığından bilet satışı dayandırılıb.

AZAL-ın mətbuat xidmətindən «APA-ECONOMICS»ə saat 17:00 radələrində problemin aradan qaldırıldığı və bilet satışının bərpa olunduğu bildirilib. Lakin şirkət rəsmiləri problemin yaranma səbəblərini açıqlamırlar.

Xatırladaq ki, ötən həftə analoji problem Bakı Dəmiryolu Vağzalının kompüter şəbəkəsində yaranıb.