İrana ən çox taxıl ixrac edən Almaniyadır

Son illər İran gələcəkdə taxıl problemi ilə üzləşməmək üçün bu məhsulun idxalını artırıb.

Lent.az-ın «zerno on layn»-a istinadən məlumatına görə, son iki həftədə İranın Dövlət Ticarət palatası Almaniyadan və Baltikyanı ölkələrdən tərkibində 12,5 faiz zülal olan 600 min ton taxıl alıb. Bunun 200 min tonu iyunun 3-də idxal olunub.

İyul – sentyabr aylarında tədarük davam etdiriləcək. Tehran taxılın bir tonunu 350 dollara alır ki, bu da dünya bazarındakı qiymətdən bahadır. Buna səbəb kimi İrana taxıl ixracı riskinin yuxarı olması göstərilir.

İslam Respublikasına ən taxıl tədarük edən Almaniyadır. 2012 –ci ilin martından 2013-cü ilin həmin ayınadək bu ölkədən İrana 1,087 milyon ton taxıl ixrac olunub.Tədarükçülər siyahısına ABŞ, Avstraliya, Qazaxıstan, Rusiya, Kanada və Ukrayna da daxildir.

Mütəxəssislərin qənaətincə, İran yaxın aylarda da xaricdən taxıl idxalını artıracaq. Taxıl üzrə Beynəlxalq Şuranın proqnozuna əsasən, 2013-2014-cü il mövsümündə İslam Respublikası 3,1 milyon ton taxıl idxal edəcək. Bu il iyunun 30-da başa çatacaq 2012-2013-cü il mövsümündə isə İran 5,1 milyon ton taxıl idxal etmək üzrədir.