Yaxın Şərqdə «BBC»-nin yayımı əngəllənir

«BBC» Yaxın Şərqin bəzi bölgələrində yayım siqnalının boğulması üzündən fasilələrlə yayımlanır.

Lent.az-ın «BBC»-yə istinadən məlumatına görə, şirkət rəhbərliyi bunun səbəblərini araşdırır.
Oktyabrın əvvəlində bu informasiya vasitəsinin yayımlandığı «Eutelsat» peyk təchizatçısı siqnalı boğduğu üçün İranı ittiham etmişdi.

Bu ilin fevralında isə «BBC» bildirmişdi ki, Tehran hakimiyyəti qurumun fars dilli verilişlərinin yayımını bir neçə dəfə kəsib, İrandakı əməkdaşları isə hədələnib.

Xatırladaq ki, Fransanın “Eutelsat” şirkəti “Hot Bird” peyki vasitəsilə yayılan İslam Respublikası telekanallarının yayımını da oktyabrın 15-dən dayandırıb. Yayımı dayandırılan İran telekanalları bunlardır: “Əl-aləm”, “PressTV”, “Səhər 1”, “Səhər 2”, “Əl- kövsər”, “Cami-cəm 1”, “Cami-cəm 2”, “Xəbər şəbəkəsi”, “Quran” şəbəkəsi”.Bu kanalların hamısı İran Dövlət Teleradio Təşkilatına tabedir.

“Eutelsat” şirkəti öz qərarının səbəbini açıqlamayıb. Bəzi şərhçilər isə bunu İranın Avropa və Amerikadan yayılan kanalların yayımına mane olmasına cavab addımı kimi qiymətləndirir.