Zaqatalada doğuşdan sonra ölən ananın SON SÖZLƏRİ: "Həkim yoxdur..." - AUDİO

Zaqatalada əməliyyatla uşaq dünyaya gətirən ananın ölümündən əvvəl əri ilə telefon danışığı (səs yazısı) yayılıb.

Lent.az xəbər verir ki, 27 yaşlı Rəna Eyvazova ölümündən bir neçə saat əvvəl əri ilə telefonla danışıb. Telefon danışığından belə məlum olur ki, qadın ağrılar içərisində can verib.

Belə ki, qadın ərinə şiddətli ağrılar keçirdiyini, ona tez-tez ağrıkəsici iynələrin vurulduğunu və hətta doğum şöbəsində ona baxacaq həkimin belə olmadığını dilə gətirir.

Lent.az mərhumun ailəsindən əldə etdiyi həmin səs yazısını təqdim edir:

Qeyd edək ki, məlum ana ölümü ötən gün günorta saatlarında Zaqatala Rayon Mərkəzi Xəstəxanasının Doğum evində qeydə alınıb.

Zaqatala rayonu Göyəm kənd inzibati ərazisinə aid Çökəkoba kənd sakini, 1995-ci il təvəllüdlü Rəna Eyvaz qızı Ramazanova uşaq dünyaya gətirmək üçün martın 18-də Zaqatala RMX-nın doğum şöbəsinə müraciət edib. Həmin gün Zaqatala RMX-nın doğum şöbəsində Rəna Ramazanovanı müayinə edən ginekoloq həkim Rəna Sultanova ona martın 19-da qeysəriyyə əməliyyatı ilə uşaq dünyaya gətirmək lazım olduğunu bildirib. Əməliyyatla qız uşağı dünyaya gətirən Rəna Ramazanovanın əməliyyatdan bir gün sonra dözülməz ağrıları başlayıb. Lakin həkimlər xəstənin yaxınlarına ciddi bir hal olmadığını bildiriblər.

Qadının vəziyyətinin ağırlaşdığını görən həkimlər martın 21-i səhər saatlarında Rəna Ramazanovanı reanimasiyaya yerləşdiriblər. Bundan bir neçə saat sonra ana dünyasını dəyişib. Mərhumun yaxınları qadının ölümünə həkim səhlənkarlığının səbəb olduğunu iddia edirlər.

Zaqatala RMX-dan bildirilib ki, mərhumun meyiti müayinə edilmək üçün Məhkəmə Tibbi Ekspertiza və Patoloji Anatomiya Birliyinin Zaqatala rayon şöbəsinə təhvil verilib. İlkin müayinəyə əsasən ananın ölümünə səbəb tromboemboliya olduğu bildirilir.

Məlumata görə, dünyaya gələn uşağın vəziyyəti normaldır.

Faktla bağlı Zaqatala rayon prokurorluğunda araşdırma aparılır.