Dünyanın və Avropanın turistlər arasında ən arzuolunan ölkələri - SİYAHI

Avstraliya 2025-ci ildə turistlər üçün dünyanın ən arzuolunan ölkəsi seçilib, Avropada isə səyahətçilər İtaliyaya ən çox maraq göstərirlər. Üstəlik, sonuncu ölkə artıq turist axınının öhdəsindən gələ bilmir.

Lent.az-ın xəbərinə görə, “Wanderlust” səyahət jurnalı reytinqin qaliblərini müəyyən etmək üçün dünyanın hər yerindən 168 min səyahətçi arasında sorğu keçirib.

Araşdırma müəlliflərinin qeyd etdiyi kimi, dörd il ərzində üçüncü dəfə oxucular Avstraliyanı dünyanın ən arzuolunan ölkəsi kimi seçiblər. Eyni zamanda, onlar son illərdə aborigenlərin təşkil etdiyi mövcud mədəni turların və tədbirlərin sayında kəskin artım olduğunu qeyd ediblər.

"Sidney kimi simvolik şəhərlərin köklərini araşdırmaqdan Şimal ərazisinin qırmızı səhrasına və 65.000 illik mədəniyyətinə qədər bu qədim torpağı görməyin yeni yollarını kəşf ediblər. Səyahətçilər həmçinin qərbə gedərək Avstraliyanın ən ucqar nöqtələrini də kəşf edirlər”, - məlumatda vurğulanır.

Dünyada turistlər üçün ən çox arzu olunan 10 ölkə

1. Avstraliya

2. Kanada

3. Yaponiya

4. ABŞ

5. Yeni Zelandiya

6. Kosta-Rika

7. Cənubi Afrika

8. Braziliya

9. Cənubi Koreya

10. Peru

Bu arada qədim xəzinələrə və məşhur mətbəxə ev sahibliyi edən İtaliya Avropanın ən arzuolunan ölkəsi seçilib.

"Florensiya, Venesiya və Amalfi sahili kimi məşhur istiqamətlər izdihamı cəlb edə bilsə də, İtaliyanın əsl cazibəsi onun az ziyarət edilən yerlərində və YUNESKO-nun siyahısına salınmış şəhərlərindədir", - araşdırma müəllifləri qeyd edirlər.

Xüsusilə, tarixi universiteti və məşhur makaronları ilə Bolonya və Avstriya-Macarıstan mənzərəsi ilə Triest kimi şəhərləri, həmçinin ənənəvi trullo daxmalarının yerləşdiyi Apuliya bölgəsini və ölkənin cənubundakı Bazilikat bölgəsindəki Matera mağara şəhərini ziyarət etməyi məsləhət görürlər.