iPhone istifadəçilərinin çoxunda arxa fonda onlarla tətbiq işləyir, brauzerdə isə həftələrlə bağlı qalmış səhifələr toplanır. Zaman keçdikcə bu, keşin, sistemin işini sürətləndirmək üçün yaradılan, lakin həddən artıq toplandıqda donmalara səbəb olan müvəqqəti faylların yığılmasına gətirib çıxarır.
Hər tətbiq və ya sayt açıldıqda cihazda şəkillər, giriş məlumatları, skriptlər və digər müvəqqəti fraqmentlər saxlanılır. Bu, səhifələrin daha tez açılmasına kömək edir, lakin uzun müddət ərzində bu faylların həcmi artır və nəticədə sistemin sürəti azalır.
Lent.az iOS 26 işlədən "iPhone"da keşin təmizlənməsi üçün əsas üsullarını təqdim edir.
Safari-də tarixçənin və sayt məlumatlarının silinməsi
Safari çoxlu müvəqqəti fayl saxlayır, buna görə də vaxt keçdikcə səhifələrin açılma sürəti zəifləyə bilər.
“Parametrlər” – “Tətbiqlər” bölməsini açın, Safari-ni tapın. “Tarixçəni və sayt məlumatlarını sil” seçimini vurun. Dövrü seçin (“Bütün dövr” ən yaxşı nəticə verir), təsdiq edin.
Əgər yalnız sayt məlumatlarını silmək, keçid tarixçəsini saxlamamaq istəyirsinizsə: “Parametrlər” – “Tətbiqlər” – Safari – “Əlavə” – “Sayt məlumatları” – “Bütün sayt məlumatlarını sil”.
Bundan sonra saytlar ilk dəfə daxil olunmuş kimi yenidən yüklənəcək, hesablarınıza yenidən daxil olmalı olacaqsınız.
Chrome brauzerində keşin təmizlənməsi
Chrome daxilində keşə nəzarət üçün xüsusi bölmə mövcuddur.
Chrome-u açın, üç nöqtəli menyuya daxil olun. “Parametrlər” – “Məxfilik və təhlükəsizlik” – “Brauzer məlumatlarını sil” bölməsinə keçin. Dövrü seçin (“Bütün dövr”), “Keşlənmiş fayllar və şəkillər” seçimi işarəli qalsın. Təsdiq edin.
Təmizləmədən sonra saytlar yenidən, sıfırdan yüklənir və çox vaxt donmalar aradan qalxır. Əlfəcinlər və saxlanmış şifrələr silinmir.
Ağır tətbiqlərin silinməsi və ya boşaldılması
Sosial şəbəkələr, video izləmə xidmətləri, oyunlar və digər ağır tətbiqlər zamanla gigabaytlarla müvəqqəti fayl toplaya bilər.
“Parametrlər” – “Əsas” – “iPhone yaddaşı” bölməsinə keçin, tətbiqlərin ölçü üzrə siyahısına baxın. Lazım olan tətbiqi açın. “Tətbiqi boşalt” (tətbiq silinir, məlumatlar qalır) və ya “Tətbiqi sil” (hər şey silinir) seçimlərindən birini seçin.
Avtomatik nəzarət üçün “İstifadə olunmayanları boşalt” funksiyasını aktivləşdirə bilərsiniz: “Parametrlər” – App Store – “İstifadə olunmayanları boşalt”.
Cihazın yenidən başladılması
Yenidən başlatma əl ilə silinməsi mümkün olmayan bir sıra gizli sistem müvəqqəti fayllarını təmizləyir.
Səsi artırma düyməsi və enerji düyməsini sıxın, söndürmə çubuğu ilə cihazı söndürün, sonra yenidən yandırın və ya “Parametrlər” – “Əsas” – “Söndür”.
Bu proses arxa fonda yığılan yükü azaldır və sistemin sabitliyini bərpa edir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
