TQDK sədri ilə bağlı xəbər var

TQDK sədri Məleykə Abbaszadə Təhsildə Qiymətləndirmə üzrə Avropa Assosasiyasının 14-cü konfransında iştirak edəcək. Bu barədə Lent.az-a qurumun mətbuat xidmətindən məlumat verilib. Belə ki noyabr ayının 7-dən 9-dək Təhsildə Qiymətləndirmə üzrə Avropa Assosasiyasının 14-cü konfransı keçiriləcək. “Beynəlxalq araşdırmalar, digər təcrübələrdən bəhrələnmə siyasəti və milli qiymətləndirmə” mövzusunda keçiriləcək konfrans Fransanın paytaxtı Paris şəhərində təşkil olunacaq. Azərbaycan Respublikasından konfransda Tələbə Qəbulu üzrə Dövlət Komissiyasının sədri və Komissiyanın aparat rəhbəri Nərminə Bayramova iştirak edəcək. Konfransda biliyin qiymətləndirilməsi sahəsində təcrübə mübadiləsinin aparılması, milli qiymətləndirmənin təbliği və bu sahədə araşdırmalar, həmçinin ayrı-ayrı ölkələrin təhsil sistemində qiymətləndirmə ilə bağlı mexanizmlər, qayda və standartlar, habelə, müxtəlif qiymətləndirmə sistemlərinin müqayisəli təhlili, müzakirəsi və uyğunlaşdırılması istiqamətində fikir mübadiləsi aparılacaq.