Tovuzda mal-qarada bruselyoz xəstəliyi aşkarlanıb

Tovuzda 8 baş mal-qarada bruselyoz aşkarlanıb. Lent.az-ın TTV-yə istinadən xəbərinə görə, profilaktik tədbirlər nəticəsində xəstə heyvanlar baytar həkimin nəzarəti altında təsərrüfatlardan kənarlaşdırılıb. Tovuz Rayon Baytarlıq İdarəsi tərəfindən rayonda heyvanlar arasında bruselyoz xəstəliyini aşkar etmək, yayılmasının qarşısını almaq məqsədilə mütəmadi olaraq müayinələr keçirilir. Baytarlıq İdarəsinin rəisi Zülfüqar Kərimov deyib ki, xəstə çıxan heyvanlar təlimat əsasında zərərsizləşdirilib: “Belə ki, heyvanlar kəsilir, daxil orqanlar ultirizasiya olunur, yəni dezinfeksiya edilərək basdırılır. Ət isə istifadəyə verilir”.

Baytarlıq İdarəsinin rəisi bildirib ki, il ərzində 18 min baş heyvanda müayinə aparılacaq. Artıq yanvar-mart aylarında diaqnostik müayinələr zamanı 14 min baş mal-qaradan qan nümunəsi götürülərək zona baytarlıq laboratoriyasında streoloji müayinə aparılıb. Bununla yanaşı, heyvanlar arasında digər xəstəliklərə qarşı da profilaktik tədbirlər həyata keçirilir. Hazırda iribuynuzlu heyvanlarda dabaq xəstəliyinə qarşı profilaktik peyvəndləmə başlayıb.