Təhsil Mərkəzi: Rusiyadakı gənclərimizin hədələrlə üzləşməsini pisləyirik

Gənclər üçün Təhsil Mərkəzi Rusiyada yaşayan 14 yaşlı həmyerlimizin bir qrup şəxs tərəfindən döyülməsi ilə bağlı Rusiyada fəaliyyət göstərən gənclər təşkilatlarına müraciət edib.

Lent. az-ın məlumatına görə, müraciətdə son günlər ərzində Rusiyada milli zəmində baş verən süni qarşıdurmaların Azərbaycan cəmiyyətində ciddi narahatlıq doğurduğu ifadə olunub. Bildirilib ki, əhali arasında diskriminasiya meyllərinin çoxalması milli zəmində həyəcanın getdikcə artmasına, həmyerlilərimizin hüquqlarının pozulmasına və ciddi psixoloji sarsıntı keçirməsinə səbəb olub. Bu problem xüsusilə yeniyetmə və gənclərdə ksenofobiya hislərinin daha geniş yayılmasına gətirib çıxarıb.

Mərkəz, ötən gün Rusiyada orta məktəb şagirdi, sağlamlıq imkanları məhdud olan 1999-cu il təvəllüdlü Kazımov Rövşən Müzəffər oğlunun sərnişin avtobusunda döyülməsini və Rusiyadakı gənclərimizin yersiz hədələrlə üzləşməsini kəskin pisləyib.

Müraciətin sonunda Rusiyadakı gənclər təşkilatlarından xahiş edilib ki, iki ölkə arasında dostluq, əməkdaşlıq və qarşılıqlı təhlükəsizliyə xələl gətirən bu problemlərin tezliklə aradan qalxmasına səy göstərsinlər.

Müraciət 50-dən artıq Rusiya gənclər təşkilatına göndərilib.