Son 10 ildə 2700-dən artıq yeni məktəb tikilib

“Təhsil sahəsində əsaslı islahatlar dönməz xarakter daşıyır”. Lent.az-ın məlumatına görə, bunu təhsil naziri Mikayıl Cabbarov Heydər Əliyevin anadan olmasının 91-ci ildönümü münasibətilə ümumtəhsil məktəblərinin VIII-XI sinif, ilk peşə ixtisas və orta ixtisas təhsili müəssisələrinin şagirdləri arasında təşkil olunan inşa yazı müsabiqəsi qaliblərinin mükafatlandırılması mərasimində çıxışı zamanı deyib. Onun sözlərinə görə, son illər Azərbaycanda təhsilin infrastrukturunun müasirləşdirilməsi istiqamətində bır sıra işlər görülüb. Nazir deyib ki, son on ildə 2700-dən artıq orta məktəb binası yenidən tikilib və ya əsaslı təmir olunub: “Nəticədə bir milyondan artıq şagirdin təlim-tədris şəraiti yaxşılaşdırılıb. Bununla yanaşı, 2007-2015-ci illərdə xaricdə təhsilə dair dövlət proqramı çərçivəsində indiyə qədər 2612 gənc Dövlət Neft Fondu hesabına dünyanın nüfuzlu universitetlərində təhsil almağa göndərilib. İki dövlət proqramının icrası nəticəsində 2004-cü ildə hər 1063 şagirdə bir kompyuter düşürdüsə, hazırda hər 18 şagirdə bir kompyuter düşür. Məktəblərin 39%-i internet şəbəkəsinə qoşulub. Ötən dövrdə ümumtəhsil müəssisələrinin müasirləşdirilməsi məsələsində Heydər Əliyev Fondunun Prezidenti, UNESCO və İSESKO-nun xoşməramlı səfir Mehriban Əliyevanın müstəsna xidmətləri olub. Belə ki, Fondun “Yeniləşən Azərbaycana yeni məktəb” layihəsinin çərçivəsində 2005/2013-cü illərdə 100 mindən artıq şagirdin təhsil aldığı 400-dək məktəb binası inşa olunub. Uşaq evləri və internat məktəblərinin inkişaf proqramı üzrə 30-dan çox uşaq müəssisəsi təmir olunub və yeni avadanlıqlarla təchiz olunub, kommunal şəraiti yaxşılaşdırılıb. Heydər Əliyev Fondunun məktəbəqədər təhsil müəssisələrinin inkişafı ilə bağlı proqramına start verilib. Qeyd olunan proqram ölkəmizin bütün bölgələrində uşaq bağçalarının geniş miqyaslı tikintisini, əsaslı təmirinin dəstəklənməsini nəzərdə tutur. Bu layihənin köməyi ilə məktəbəqədər təhsil müəssisələrinin infrastrukturunun müasirləşdirilməsi mümkün olacaq”.