Rezidentura təhsilinin məzmunu və təşkilinin yeni QAYDALARI

Azərbaycan Nazirlər Kabineti “Rezidentura təhsilinin məzmunu və təşkili Qaydaları”nı yeni redaksiyada təsdiqləyib. NK-dan Lent.az-a verilən məlumata görə, Azərbaycan vətəndaşları üçün rezidentura təhsili dövlət sifarişi və ya ödənişli əsaslarla həyata keçirilir. Əcnəbilər və vətəndaşlığı olmayan şəxslər rezidenturaya ödənişli əsaslarla qəbul olunurlar.

Rezidenturaya qəbul planı hər bir ixtisas üzrə həkim-mütəxəssislərə ehtiyac nəzərə alınmaqla, Səhiyyə Nazirliyinin təklifləri və Nazirlər Kabinetinin təqdimatı əsasında Azərbaycan Respublikasının Prezidenti yanında Təhsil üzrə Komissiya tərəfindən müəyyən edilir. Rezidenturaya qəbul Tələbə Qəbulu üzrə Dövlət Komissiyası tərəfindən aparılır. Dövlət sifarişi əsasında rezidentura təhsili almış şəxslər rezidenturanı bitirdikdən sonra əmək fəaliyyətlərini 3 (üç) il müddətində Səhiyyə Nazirliyinin göndərişinə əsasən dövlət səhiyyə müəssisələrində davam etdirməlidirlər. Dövlət sifarişi əsasında rezidenturaya qəbul olunanların hüquq və öhdəlikləri onlarla Səhiyyə Nazirliyi arasında bağlanılmış mülki-hüquq müqaviləsi ilə tənzimlənir. Rezidentura təhsili klinik bazaya malik olan ali tibb təhsili və elmi müəssisələrdə və ya Səhiyyə Nazirliyi tərəfindən rezidentlərin hazırlanması üçün klinik baza kimi müəyyən edilən tibb müəssisələrində təşkil edilir. Rezidenturada ayrı-ayrı həkim-mütəxəssis ixtisasları üzrə təhsil müddəti 2 ildən 5 ilə qədər olmaqla, bu qaydaların əlavəsi ilə müəyyən edilir. Rezidenturada təhsil proqramında auditoriya tədris yükü həftədə 6 saatdan çox olmamalıdır. Rezidentura təhsil proqramları Təhsil Nazirliyi ilə razılaşdırılmaqla, Səhiyyə Nazirliyi tərəfindən təsdiq edilir və bu təhsil proqramları əsasında tədris planları hazırlanır. Rezidentin fərdi iş planları rezidentura hazırlığını həyata keçirən müəssisələrin müvafiq elmi (tibbi) şuralarının iclaslarında təsdiq edilir. Rezidentin hazırlığına bilavasitə rəhbərliyin həyata keçirilməsi üçün klinik baza kimi müəyyən edilmiş müəssisələrdə kuratorlar təyin edilirlər. Bir kuratorun ikidən çox rezidentə rəhbərlik etməsinə yol verilmir.

Rezidenturada hazırlığın son ilində rezidentlər ixtisas üzrə təhsil proqramında müəyyən edilmiş müddətə uyğun olaraq stajorluq keçirlər. Bunun üçün rezident Azərbaycan Respublikasının Səhiyyə Nazirliyi tərəfindən müvafiq tibb ixtisası üzrə ölkənin tibb müəssisələrinin birinə stajorluğa göndərilir. Təhsil müddəti başa çatdıqda, fərdi iş planını tam həcmdə yerinə yetirmiş rezidentlər yekun attestasiyaya buraxılırlar. Rezidentlərin yekun attestasiyası Səhiyyə Nazirliyinin təsdiq etdiyi Attestasiya Komissiyası tərəfindən ali tibb təhsili müəssisəsində aparılır. Yekun attestasiyanın hər hansı mərhələsindən keçə bilməyən rezidentlər həmin mərhələ üzrə növbəti ildə yekun attestasiyadan keçməlidirlər. Yekun attestasiyadan müvəffəqiyyətlə keçərək rezidenturanı bitirənlərə Attestasiya Komissiyasının qərarı əsasında müvafiq ixtisas üzrə “həkim-mütəxəssis” ali peşə-ixtisas dərəcəsi və müvafiq dövlət nümunəli diplom verilir. Rezidentin nəzəri biliklərə və peşə vərdişlərinə yiyələnməsinə, fərdi iş planlarının yerinə yetirilməsinə görə kuratorun vəzifə maaşına hər bir rezident hazırlığı üçün ayda 20 manat əlavə haqq ödənilir. Bu vəsait rezidenturada həkim-mütəxəssis hazırlığı aparılan ixtisaslar üzrə dövlət sifarişi ilə hər bir təhsilalana dövlət büdcəsindən ayrılan təhsil xərclərinin hesabına həyata keçirilir. Rezidentlər təhsil aldıqları dövrdə baza ali tibb təhsili əsasında tutulmasına icazə verilən həkim vəzifələrində əmək qanunvericiliyinə uyğun olaraq işləyə bilərlər.

Rezidenturada həkim-mütəxəssis hazırlığı aparılan ixtisaslar üzrə təhsilin müddəti

İxtisasların şifri	İxtisasların adı	Təhsil müddəti
1	2	3
060901	Anesteziologiya-reanimatologiya	3 il
060902	Ümumi cərrahiyyə	5 il
060903	Neyrocərrahiyyə	5 il
060904	Plastik cərrahiyyə	5 il
060905	Ürək-damar cərrahiyyəsi	5 il
060906	Uşaq cərrahiyyəsi	5 il
060907	Otorinolarinqologiya	4 il
060908	Travmatologiya-ortopediya	5 il
060909	Onkologiya	5 il
060910	Urologiya	5 il
060911	Oftalmologiya	3 il
060912	Mamalıq-ginekologiya	5 il
060913	Psixiatriya	2 il
060914	Nevrologiya	4 il
060915	Terapiya	4 il
060916	Kardiologiya	4 il
060917	Nefrologiya	4 il
060918	Qastroenterologiya	4 il
060919	Hematologiya	4 il
060920	Dermatovenerologiya	4 il
060921	İmmunologiya	2 il
060922	Allerqologiya	3 il
060923	Yoluxucu xəstəliklər	4 il
060924	Revmatologiya	4 il
060925	Endokrinologiya	4 il
060926	Narkologiya	2 il
060927	Fizioterapiya və tibbi bərpa	3 il
060928	Ftiziatriya	2 il
1	2	3
060929	Patoloji anatomiya, məhkəmə-tibbi ekspertiza	3 il
060930	Pediatriya	4 il
060931	Şüa terapiyası	3 il
060932	Şüa diaqnostikası	4 il
060933	Stomatologiya	3 il
060934	Üz-çənə cərrahiyyəsi	5 il
060935	Sosial gigiyena və səhiyyənin təşkili	3 il
060936	Gigiyena	2 il
060937	Mikrobiologiya	2 il
060938	Laboratoriya işi	2 il
060939	Genetika	2 il
060940	Epidemiologiya	2 il