Müəllimlərin imtahanı başlayıb

2013-2014-cü tədris ilində ümumi təhsil və ilk peşə-ixtisas təhsili müəssisələrinə müəllimlərin işə qəbuluna dair test imtahanları başlayıb. Təhsil Nazirliyindən Lent.az-a verilən məlumata görə, imtahanlar iyulun 25-dən avqustun 7-dək keçiriləcək.

Bu günkü imtahan Azərbaycan dili və ədəbiyyat müəllimi ixtisası üzrədir. Bu fənn üzrə imtahanda 296 vakant yerə 2589 namizəd iştirak edir.

Test imtahanları Azərbaycan Dövlət İqtisad Universitetinin Bakı şəhəri, İstiqlaliyyət küçəsi, 6 ünvanında yerləşən əsas korpusunda keçiriləcək.

Test imtahanına 1 saat vaxt verilir. Bu müddət ərzində namizəd ixtisas üzrə ümumi təhsil proqramını əhatə edən 25, məntiqdən, fənnin tədrisi metodikası və təlim strategiyalarının hər birindən 5 olmaqla, 35 sualı cavablandırmalıdır. İmtahan başa çatdıqdan sonra monitorda düzgün cavabların sayı qeyd olunur. İmtahanın gedişi videolentə alınır. Qaydaları pozan (mobil telefondan, əlavə vəsaitlərdən, başqasının monitorundan istifadə edən, imtahanın gedişinə mane olan) şəxslər imtahandan xaric olunacaq və nəticəsi ləğv ediləcək.

Test imtahanlarından uğurlu nəticə əldə edənlər üçün avqustun 12-dən 16-dək müsahibə təşkil olunacaq və onların şəxsi səhifəsinə bu barədə məlumat göndəriləcək. Müsahibə proqramı Təhsil Nazirliyinin rəsmi internet saytında “Müəllimlərin işə qəbulu” səhifəsində yerləşdirilib.