Mikayıl Cabbarov: “Ən böyük nailiyyət təhsil mühitinin sağlamlaşdırılmasıdır”

“Respublikada ilk dəfə olaraq Bakı şəhərindəki orta məktəblərdə çalışan orta məktəb müəllimlərinin sınaq qiymətləndirilməsi həyata keçirilir”. Lent.az-ın məlumatına görə, bunu təhsil naziri Mikayıl Cabbarov bildirib. O qeyd edib ki, təhsil sistemində diaqnostik qiymətləndirmə geniş istifadə olunan alət olsa da, Azərbaycanda müəllimlərin tətbiq etdiyi bilik səviyyəsi, metodik və kommunikativ yanaşma ilə bağlı bilikləri barədə sistemli məlumat yoxdur. Belə bir diaqnostik qiymətləndirmə də heç bir zaman keçirilməyib. M.Cabbarov qeyd edib ki, sınaq qiymətləndirmə Bakıda fəaliyyət göstərən məktəblərdə 30 minə yaxın müəllimi əhatə edir. Növbəti mərhələdə bu proses bütün ölkə ərazisində də tətbiq ediləcək. Nazir onu da əlavə edib ki, bu tədris ilində ən böyük nailiyyət təhsil mühitinin dəyişdirilməsi, sağlamlaşdırılması istiqamətində atılan addımlar olub. O xüsusi vurğulayıb ki, təhsil sistemində əsas meyar bilik səviyyəsi olmalıdır və belə də olacaq.