Magistraturaya proqram seçimi başa çatdı

Ali təhsil müəssisələrinin magistratura səviyyəsinə proqram seçimi başa çatıb. TQDK-nın mətbuat xidmətindən Lent.az-a verilən məlumata görə, magistraturaya proqram seçimi mayın 1-də başlanıb və ayın 5-də başa çatmalı idi. Lakin dünən TQDK proqram seçiminin vaxtını bu gün saat 11-dək uzatmışdı.

Proqramı seçib təsdiq etmiş bakalavrlar mayın 22-dən 25-dək öz elektron ərizələrinə daxil olaraq ikinci mərhələ üçün "Bakalavrın imtahana buraxılış vərəqəsi"ni çap edib götürməlidirlər. Qəbul imtahanının ikinci mərhələsi 2014-cü il mayın 25-də Bakı, Naxçıvan və Gəncə şəhərlərində keçiriləcək. İkinci mərhələdə imtahan suallarının cavablandırılmasına 1 saat 30 dəqiqə vaxt ayrılır.

2014-cü ildə “Jurnalistika” ixtisasını seçmək istəyənlər üçün Qabiliyyət imtahanı keçirilib və 25 bakalavr həmin imtahandan “məqbul” alıb. 44 saylı proqramı yalnız həmin bakalavrlar seçə bilər.

27 saylı proqram üzrə ADPU-nun “Menecment (təhsilin təşkili və idarə olunması)” ixtisaslaşmasına müsabiqədə yalnız Təhsil ixtisasları qrupunu bitirən bakalavrlar iştirak edə bilərlər. 4, 12, 24, 25, 29, 30, 41, 43, 44, 51, 52, 57 və 58 saylı proqramlarını seçən bakalavrlar test tapşırıqları əvəzinə yazılı imtahan verirlər. İxtisas üzrə test suallarına cavabın maksimal balı 50-dir. Yazı işlərinin nəticəsi də 50 ballıq şkalada qiymətləndirilir. Azərbaycan Turizm İnstitutunda “Turizm işi” ixtisaslaşması üzrə magistr hazırlığının aparılması nəzərdə tutulan beynəlxalq layihə yekunlaşdığına görə həmin ixtisaslaşmaya bu il qəbul aparılmayacaq.

Qeyd edək ki, bu il magistraturaya yalnız əyani təhsilalma forması üzrə plan yerləri verilib. Plan yerlərinin sayı 6565-dir. Onlardan 2547 yer dövlət sifarişlidir.