İsmayıllıda Pilot Məşğulluq Mərkəzi açılıb

İsmayıllı rayonunda işsiz və iş axtaran vətəndaşların məşğulluğunun həll olunması üçün yaradılan Pilot Məşğulluq Mərkəzinin açılışı olub. Açılışda əmək və əhalinin sosial müdafiəsi naziri Səlim Müslümov da iştirak edib. Nazirliyin ictimaiyyətlə əlaqələr şöbəsindən Lent.az-a verilən xəbərə görə, S. Müslümov sosial-iqtisadi inkişaf strategiyasında ölkədə məşğulluq imkanlarının artırılmasının və əhalinin layiqli iş yerləri ilə təmin olunmasının mühüm yer tutduğunu bildirib: “Məşğulluq Mərkəzlərinin xidmətlərindən əhalinin daha səmərəli və çevik formada yararlana bilmələri üçün bu xidmətlərin keyfiyyətinin artırılması, işsiz və iş axtaranların əmək bazarına inteqrasiyası, real məşğulluq imkanlarına yiyələnmələri üçün təsirli vasitələrin formalaşdırılması vacibdir. Bununla bağlı olaraq, həmin mərkəzlərin ümumən iş şəraitində, təchizat sistemlərində də məqsədyönlü dəyişikliklər aparılmalı, yüksək səviyyəli informasiya bazası yaradılmalıdır. Məşğulluq Mərkəzləri iş axtaranlar üçün daha əlçatan xidmətlər göstərməlidir. İsmayıllı rayonunda yaradılan pilot mərkəz bu istiqamətdə ilk addımdır”.

Pilot Məşğulluq Mərkəzində ərazinin əmək bazarını dolğun şəkildə əks etdirən, eləcə də işsiz və iş axtaranlar barədə məlumatlar yerləşən informasiya bazası mövcuddur. Burada vakant iş yerləri barədə məlumat-informasiya köşkü quraşdırılıb, daimi internet bağlantısı təmin olunub, peşəyönümü məsləhət və psixoloji adaptasiya xidmətlərinin göstərilməsi, iş axtaranlara iş axtarışı texnologiyalarının aşılanması üçün lazımi kabinələr yaradılıb. Mərkəzdə müvəqqəti xarakterli iş axtaran şəxslər üçün Əmək birjası xidməti də göstəriləcək.

Mərkəzdə iş axtarışı ilə bağlı təcrübə və informasiyanı könüllü şəkildə bölüşən vətəndaşlar üçün “İş klubu” fəaliyyət göstərəcək.

Mərkəz müvafiq avadanlıqlarla, aktiv məşğulluq tədbirləri, peşə standartları, iş axtarışı texnologiyası və s. ilə bağlı maarifləndirici vasitələrlə təchiz olunub.

S. Müslümov mərkəzdə yaradılmış şəraitlə tanış olub.

Daha sonra İsmayıllı rayon Məşğulluq Mərkəzinin təşkilatçılığı ilə Əmək Yarmarkası keçirilib.