Əli Əhmədov: “Ana və uşaq ölümlərinə təəssüflənirəm”

”Azərbaycanda ana və uşaq ölümü ilə bağlı hadisələrdən təəssüflənirəm. İstəyimizdən asılı olmayaraq, belə şeylər olur. Bu hadisələr ciddi şəkildə araşdırılır və bununla bağlı müvafiq tədbirlər görülür”. Lent.az-ın məlumatına görə, bunu Baş nazirin müavini, Yeni Azərbaycan Partiyasının sədr müavini Əli Əhmədov Azərbaycanda ana və uşaq ölümü faktlarına münasibət bildirərkən deyib. Onun sözlərinə görə, baş verən ana-uşaq ölümü halları diqqətdən kənarda qalmır: “Əgər kiminsə günahı ucbatından belə şeylər baş verirsə, həmin şəxs cəzasını alır. Bu gün prezident İlham Əliyevin tələbi ondan ibarətdir ki, Azərbaycanda səhiyyə xidmətinin keyfiyyəti yaxşılaşdırılsın, ana-uşaq ölümü kimi hallar baş verməsin və bu cür hallar aradan qaldırılsın. Ümumiyyətlə, Azərbaycan əhalisinə göstərilən səhiyyə xidmətinin keyfiyyəti yaxşılaşdırılsın. Bizim məqsədimiz bundan ibarətdir. Azərbaycanda hər bir vətəndaşın yüksək səviyyəli tibbi xidmətlə təmin olunmaq hüququ var. Səhiyyənin infrasturukturu yenilənib, Azərbaycanda dünya standartlarına uyğun səhiyyə müəssisələri istifadəyə verilib. İndiki halda bizim qarşımızda duran əsas məsələ odur ki, səhiyyə xidmətinin keyfiyyəti, həkimlərin peşəkarlıq səviyyəsi yüksəlsin. Hər bir azərbaycanlıya ölkəmizdə yüksək səviyyədə səhiyyə xidməti göstərilsin ki, Azərbaycandan kənara müalicə üçün gedənlər olmasın”.