Gömrük Akademiyasında ilk "Məzun günü" qeyd olunub
03 iyul 2018 18:18 (UTC +04:00)

Gömrük Akademiyasında ilk "Məzun günü" qeyd olunub

Dövlət Gömrük Komitəsinin Akademiyasında ilk "Məzun günü" qeyd olunub.

 

Komitədən Lent.az-a verilən məlumata görə, "Boulevard Hotel"də keçirilən tədbirdə Dövlət Gömrük Komitəsinin sədri, gömrük xidməti general-leytenantı Səfər Mehdiyev, Təhsil nazirinin müavini Firudin Qurbanov, Komitə sədrinin müavinləri və idarə rəisləri, Akademiyanın müəllimləri və valideynlər iştirak edib.

 

Mərasim dövlət himninin oxunması ilə başlayıb.

 

Sonra Akademiyanın rəisi, gömrük xidməti general-mayoru İsmayıl Ələkbərov məzunları təbrik edib və bildirib ki, 4 il əvvəl fəaliyyətə başlayan Dövlət Gömrük Komitəsinin Akademiyası qısa zaman ərzində ölkənin aparıcı ali təhsil ocaqlarından birinə çevrilib. Ölkəmizdə təhsilə, gənc nəslin təlim-tərbiyəsinə xüsusi qayğı göstərildiyi qeyd olunub və Akademiyanın ilk məzunlarının tədris prosesini yüksək nəticələrlə başa vurmaları təhsil sahəsində görülən işlərin nəticəsi kimi qiymətləndirilib.

 

Öz növbəsində, Dövlət Gömrük Komitəsinin sədri Səfər Mehdiyev məzunları təbrik edərək onlara uğurlar arzulayıb və Akademiyanın ilk "Məzun günü"nü həm də Dövlət Gömrük Komitəsinin tarixində mühüm hadisə kimi qiymətləndirib.

 

Ümummilli lider Heydər Əliyevin daim təhsilə, gənc nəslin elmi biliklərə yiyiələnməsinə xüsusi diqqət göstərdiyini vurğulayan Komitə sədri, bu istiqamətdə formalaşan dövlət siyasətinin Prezident İlham Əliyev tərəfindən uğurla davam etdirildiyini, respublikamızın ictimai-siyasi həyatında gənclərə xüsusi yer verildiyini, ixtisaslı gənc kadrların hazırlanmasının, işlə təmin olunmasının dövlətimizin strateji hədəflərindən birinə çevrildiyini bildirib.

 

Komitə sədri hazırda Akademiya üçün mükəmməl elmi-texniki bazaya malik, müasir tələblərə cavab verən yeni binanın inşasını da Prezident İlham Əliyevin peşəkar kadrlara, ixtisaslaşmış təhsil ocaqlarının inkişafına göstərdiyi qayğının təzahürü kimi qiymətləndirib. Səfər Mehdiyev ümidvar olduğunu bildirib ki, aldıqları bilik və təlim-tərbiyə sayəsində ilk məzunlar gələcək həyat və fəaliyyətlərində təhsil aldıqları tədris ocağını uğurla təmsil edəcəklər.

 

Təhsil nazirinin müavini Firudin Qurbanov bildirib ki, 2018-ci il Azərbaycan Prezidenti İlham Əliyev tərəfindən "Azərbaycan Xalq Cümhuriyyəti İli" elan edilib və Gömrük Akademiyasının ilk məzunlarının bu il ali məktəbi bitirməsi xoş hadisədir. Cümhuriyyətin mövcud olduğu qısa müddət ərzində təhsil sahəsində mühüm nailiyyətlər əldə olunduğunu qeyd edən Firudin Qurbanov, Azərbaycan yenidən müstəqilliyinə qovuşduqdan sonra təhsil sahəsində, ixtisaslı kadrların hazırlanması istiqamətində daha mühüm və məqsədyönlü addımlar atıldığını diqqətə çatdırıb. Dövlət Gömrük Komitəsinin Akademiyasının təsis edilməsinin də ixtisaslı kadrların hazırlanması sahəsində görülən işlərin bariz nümunəsi olduğunu bildirən nazir müavini, fəaliyyət göstərdiyi qısa vaxt ərzində bu təhsil ocağının mühüm nailiyyətlər əldə etdiyini vurğulayıb.

 

Daha sonra tədbirdə Akademiyanın müəllimləri, valideynlər və tələbələr çıxış edərək məzunlara uğurlar diləyiblər.

 

Tədbir çərçivəsində təlim-tədris prosesində fərqlənən müəllim və tələbələr mükafatlandırılıb.

 

Qeyd edək ki, bu il Gömrük Akademiyasını 37 tələbə hüquqşunaslıq və iqtisadiyyat ixtisasları üzrə bitirib və onların yarıdan çoxu təhsilini magistr pilləsi üzrə davam etdirəcək. O cümlədən, məzunlardan 7 nəfəri Avropanın müxtəlif universitetlərində magistr təhsili alacaq.

 

Tədbir ilk məzunlara diplomların təqdim edilməsilə yekunlaşıb.

 

1 2 3 4 5 İDMAN XƏBƏRLƏRİ
# 231
avatar

Oxşar yazılar