“Əvvəlki illərdə nəşr olunan dərsliklərlə bağlı Tələbə Qəbulu üzrə Dövlət Komissiyası (TQDK) tərəfindən monitorinq keçirilib”. Bunu Lent.az-a açıqlamasında Təhsil Nazirliyinin tədris resursları şöbəsinin müdir müavini Əsgər Quliyev bildirib.
O qeyd edib ki, nəticədə bəzi dərsliklərdə nöqsanlar aşkar olunub, çatışmazlıqlar müəyyənləşdirilib. “Təhsil Nazirliyi ötən 1 il ərzində həmin dərsliklərin nəşriyyat və müəlliflərlə birlikdə yenidən işlənməsini təmin edib. Hazırlanmış son variant TQDK-ya yenidən təqdim olunub, onların xeyir-duasını alandan sonra həmin vəsait çap edilib”.
Nazirlik rəsmisi vurğulayıb ki, əvvəlki illərdən fərqli olaraq, bu il yeni hazırlanan dərsliklər çap olunmazdan əvvəl TQDK-ya ekspertizaya verilib: “Həmin dərsliklər TQDK-nın ekspertləri tərəfindən yenidən qiymətləndirilib və o da tenderin nəticəsində nəzərə alınıb. Bu, bizə imkan verib ki, dərsliklər çap olunandan sonra orada nöqsanların minimuma endirilməsini təmin edək”.
Ə. Quliyevin sözlərinə görə, Təhsil Nazirliyi dərsliklərdə nöqsanların olmamasına çalışır. “Amma bir reallıqdır ki, hələ də Azərbaycan cəmiyyətində peşəkar müəllif kollektivlərini tam formalaşdırmaq mümkün olmayıb. Ancaq bu istiqamətdə nazirliyin atdığı addımlar nəticəsində müəyyən irəliləyişlər var. Hesab edirik ki, qarşıdakı illərdə dərsliklərin hazırlanmasına elmi-pedaqoji potensialı daha aktiv şəkildə cəlb etmək mümkün olacaq”.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
