BANM “British Council” ilə əməkdaşlıq edəcək

Bakı Ali Neft Məktəbində (BANM) ali məktəbin rektoru Elmar Qasımov və “British Council” təşkilatının regional direktoru Maykl Börd arasında birgə əməkdaşlığın qurulması və inkişaf etdirilməsi məqsədi ilə “Əməkdaşlıq Protokolu” imzalanıb. Lent.az-ın məlumatına görə,protokolda ingilis dili müəllimləri üçün dərslərdən kənar treninqlərin keçirilməsi, idarəetmə aparatının, peşə yönümlü və ixtisas dərslərini tədris edən kafedraların işçiləri üçün Bakı Ali Neft Məktəbində ödənişli ingilis dili dərslərinin təşkili və BANM resurs mərkəzinin ingilis dilində nəşr edilmiş ümumi fənlər üzrə kitablar və elektron vəsaitlərlə zənginləşdirilməsinə köməklik göstərilməsi nəzərdə tutulub.

Tədbirdə çıxış edən rektor bildirib ki, həyata keçirilən düzgün, uzaqgörən siyasət nəticəsində ölkəmiz bütün sahələrdə dinamik inkişaf etməkdədir. O, qeyd edib ki, bu inkişafın nəticəsi olaraq artıq Azərbaycan istər dünyanın, istərsə də regionun önəmli dövlətinə çevrilib.
Prezident İlham Əliyevin rəhbərliyi altında həyata keçirilən uğurlu təhsil islahatlarından danışan rektor vurğulayıb ki, Bakı Ali Neft Məktəbinin və bir çox beynəlxalq standartlara cavab verən təhsil ocaqlarının yaradılması buna bariz nümunədir.
“British Council” təşkilatının regional direktoru Maykl Börd çıxış edərək bildirib ki, Azərbaycanda beynəlxalq standartlara cavab verən BANM kimi təhsil ocaqlarının yaradılması həm çox sevindirici, həm də çox önəmli məsələdir. O, “British Council” təşkilatı olaraq, Bakı Ali Neft Məktəbi ilə müxtəlif tədris və təhsil layihələri çərçivəsində əməkdaşlıq etməkdən məmnunluq duyduqlarını qeyd edib.