Dövlət qurumlarına ayrılan avtomobillərin sayı dəyişdi

Üç dövlət qurumu üçün nəzərdə tutulan xidməti minik avtomobillərinin limiti artırılıb

Nazirlər Kabineti “Azərbaycan Respublikasında dövlət büdcəsindən maliyyələşən idarə, müəssisə və təşkilatlarda nəqliyyat vasitələrindən istifadə qaydalarının təkmilləşdirilməsi haqqında” 2011-ci il 18 iyul tarixli 120 saylı qərarına dəyişikliklər edib.

Lent. az-ın verdiyi məlumata görə, dəyişikliyə əsasən Bakı Şəhər İcra Hakimiyyəti başçısının aparatı üçün xidməti minik avtomobillərinin say həddi (limiti) 13 ədəd, rayon (şəhər) icra hakimiyyəti başçısı, onun müavinləri, şəhər üzrə nümayəndəsi, qəsəbə və kənd nümayəndələri (əhalisinin sayı 10 min nəfərdən artıq olan), Bakı Şəhər İcra Hakimiyyəti başçısı aparatının birbaşa tabeliyində olan dövlət orqanlarının rəhbərləri, rayon (şəhər) məhkəmələrinin hər biri üçün xidməti minik avtomobillərinin say həddi (limiti) bir ədəd, Bakı, Gəncə və Sumqayıt şəhər məhkəmələrinin hər biri üçün isə iki ədəd olmaqla müəyyən edilib.

Qaçqınların və Məcburi Köçkünlərin İşləri üzrə Dövlət Komitəsi və Ailə, Qadın və Uşaq Problemləri üzrə Dövlət Komitəsi üçün avtomobil limiti 7 avtomobildən 8 avtomobilə, Dini Qurumlarla İş üzrə Dövlət Komitəsi üçün avtomobil limiti isə 12 avtomobildən 13 avtomobilə qədər artırılıb. Bu artım dövlət orqanlarının aparat işçiləri üçün nəzərdə tutulub.

Maliyyə Nazirliyi bu qərardan irəli gələn məsələləri həll etmək tapşırılıb.