Bakı Ali Neft Məktəbində “Gənclər günü” ilə bağlı tədbir keçirilib

Bakı Ali Neft Məktəbində (BANM) “Gənclər günü” münasibəti ilə tədbir keçirilib. Ali məktəbin ictimaiyyətlə əlaqələr şöbəsindən Lent.az-a verilən məlumata görə, tədbirdə Prezident Administrasiyasının İctimai-siyasi məsələlər şöbəsinin müdirinin müavini Tahir Süleymanov, ARDNŞ-nin kadr, rejim və informasiya texnologiyaları üzrə vitse-prezidenti Xalik Məmmədov, gənclər və idman nazirinin müavini İntiqam Babayev, Azərbaycan Respublikasının Prezidenti yanında Gənclər Fondunun sədri Fərhad Hacıyev, Azərbaycan Tələbə Gənclər Təşkilatları İttifaqının sədri Şahin İsmayılov, ATGTİ-nin bir qrup üzvləri, Bakı Ali Neft Məktəbində “Gənc Neftçilər” adlı respublika üzrə keçirilən olimpiadanın qalibləri, habelə Bakı Ali Neft Məktəbinin professor-müəllim və tələbə heyəti iştirak edib.

Tədbiri giriş sözü ilə açan Bakı Ali Neft Məktəbinin rektoru Elmar Qasımov BANM-nin fəaliyyəti haqqında ətraflı məlumat verib. O deyib ki, ali təhsil olacağı yeni yaranmasına baxmayaraq, TQDK tərəfindən tərtib edilən 2012 və 2013-cü illərin ali təhsil müəssisələrinin reytinq cədvəlində I yer qazanıb və ali məktəblər arasında mütləq lider olub. E. Qasımov qeyd edib ki, bu gün Azərbaycanda gənclərin inkişafı və gələcəkdə bir lider kimi yetişməsi üçün bütün lazımi şərait dövlət tərəfindən yaradılıb.

BANM kollektivini ali təhsil müəssisəsinin qısa zaman çərçivəsində əldə etdikləri uğurlar münasibətilə təbrik edən Tahir Süleymanov bildirib ki, gənclər, xüsusən tələbə gənclər dövlət quruculuğunda, iqtisadiyyatın, elmin, təhsilin, mədəniyyətin, incəsənətin və idmanın inkişafında əhəmiyyətli rol oynayır. Azərbaycanın insan potensialının özəyi olan gənclərin inkişafı və həyatda özlərini təsdiq etmələri üçün hər cür şəraitin dövlət tərəfindən yaradıldığını qeyd edən T. Süleymanov vurğulamışdır ki, hər bir gənc bu imkanlardan maksimum bəhrələnməlidir.

ARDNŞ-nin kadr, rejim və informasiya texnologiyaları üzrə vitse-prezidenti Xalik Məmmədov bildirib ki, onların daxil olduqları ali məktəb yeni yaranmasına baxmayaraq, iki ildir ki, TQDK-nın tərtib etdiyi təhsil müəssisələrinin reytinq cədvəlində I yer qazanıb və bir çox göstəricilərə görə ali məktəblər arasında lider olub. Bunun yüksək nailiyyət olduğunu bildirən X.Məmmədov eyni zamanda böyük məsuliyyət olduğunu da qeyd edib.

Tədbirin sonunda BANM və ATGTİ tərəfindən “Gənc Neftçilər” olimpiadasının 3 iştirakçısına - 1, 2 və 3-cü yerlərin qaliblərinə və digər 5 ən yüksək bal toplayan olimpiada iştirakçısına, 3 nəfər şahmat turnirinin qalibinə, futbol yarışmasında iştirak edən 1, 2 və 3-cü yerləri qazanmış komandaların oyunçularına, habelə ölkəmizdə ekologiyanı qoruyaq ideyasına dəstək kompaniyası çərçivəsində “ Ecoboys” video çarxının müəllifləri olan BANM-nin 6 tələbəsinə diplomlar, həvəsləndirici diplomlar, sertifikatlar və hədiyyələr verilib.