Azərbaycanın şərqində geodinamik vəziyyət öyrənilir

İtaliyalı və azərbaycanlı geoloqlar Şəki–Zaqatala bölgəsində geodinamik vəziyyəti öyrənir. AMEA Geologiya və Geofizika İnstitutunun ictimaiyyətlə əlaqələr şöbəsindən Lent.az-a verilən xəbərə görə, bununla əlaqədar Geodinamika və Seysmologiya şöbəsinin dəvəti ilə İtaliya Ekoloji Təhlil Metodologiyaları İnstitutu Milli Tədqiqat Şurasının (CNR) mütəxəssisi Luçiano Teleska Azərbaycana gələrək Şəkidə yerləşən Qravitasiya və GPS (Qlobal Yertəyinetmə Sistemi) stansiyaları ilə tanış olub və birgə tədqiqat imkanlarını araşdırıb.

Tədqiqatlarda məqsəd yüksək geodinamikliyi ilə seçilən Şəki-Zaqatala bölgəsində müntəzəm qravimetrik siqnalları və GPS texnologiyaları vasitəsi ilə əldə edilən məlumatları statistik metodla tədqiq etməkdir. Nəticədə anomal effektlərin dəyişmə parametrləri və ümumi geodinamik vəziyyət haqqında məlumatlar əldə ediləcək.

Bu üsulun başqa regionlarda da tətbiqi nəzərdə tutulur.

Tədqiqat işləri AMEA və İtaliyanın Elmi Tədqiqat Şurasının 2014 və 2015-ci illəri əhatə edən əməkdaşlıq proqramı çərçivəsində həyata keçirilir.