Azərbaycanın ən yaxşı həbsxana işçiləri bunlardır

Penitensiar xidmətin tabe qurumlarında əməkdaşların peşəkar hazırlığının yüksəldilməsi, xidməti vəzifə borclarını nümunəvi yerinə yetirən bacarıqlı əməkdaşların vəzifədə irəli çəkilməsi və “Ən yaxşı əməkdaş”ın aşkar edilərək həvəsləndirilməsi məqsədilə tabe qurumlarda müsabiqə keçirilib. Lent.az-ın Penitensiar xidmətin saytına istinadən verdiyi məlumata görə, Mərkəzi Müsabiqə Komissiyasına təqdim olunan əməkdaşlar “Ən yaxşı əməkdaş” adı uğrunda mübarizədə peşə hazırlığı, fiziki hazırlıq və atıcılıq bacarıqlarını nümayiş etdiriblər. Müsabiqədə ümumilikdə 65 əməkdaş iştirak edib. Onlar arasında qalib adını 9 saylı Məntəqə tipli cəzaçəkmə müəssisəsinin nəzarətçisi, ədliyyə baş çavuşu Sabir Ağayev qazanıb. Konvoy taborunun 3-cü konvoy bölüyünün mühafizəçisi, ədliyyə baş çavuşu Ehtiram İslamov ikinci, Avtonəqliyyat təsərrüfatının kiçik inspektoru ədliyyə kiçik giziri Vasif Hüseynov üçüncü yerə layiq görülüb.