Azərbaycanın 500 min hektar ərazisi şoranlaşıb

“Azərbaycan ərazisinin 500 min hektarı şoranlaşıb. Şoranlaşma, eroziya torpağın xəstəliyidir”. Lent.az-ın məlumatına görə, bunu Dövlət Torpaq və Xəritəçəkmə Komitəsinin sədri Qərib Məmmədov jurnalistlərə açıqlamasında deyib. Onun sözlərinə görə, Azərbaycanın əsas kənd təsərrüfatı sahəsi Kür-Araz ovalığıdır. Bu ərazinin də mənfi relyef səviyyəsinə məxsus olduğunu deyən Q. Məmmədov qeyd edib ki, qrunt suyunun səviyyəsi qalxanda həmin ərazilərdə şorlaşma baş verir: “Bunun nəticəsində də orada bitki əkmək mümkün olmur. Mövcud problemin qarşısını almaq üçün kollektor-drenaj işləməlidir ki, qrunt suyunun səviyyəsi aşağı düşsün və kənd təsərrüfatı bitkilərinə ziyan dəyməsin. Bu da təxminən 500 min hektar ərazini əhatə edən zəif, orta, şiddətli dərəcədə şorlaşma sahələridir”.

Q. Məmmədov qeyd edib ki, Gürcüstanla sərhədlərin delimitasiyası sahəsində yenilik yoxdur: “Hazırda ekspertlər səviyyəsində danışıqlar gedir. Gürcüstan tərəfindən diplomatik yolla dəvət olandan sonra bu məsələyə baxılacaq”.