Azərbaycanda SABAH qruplarına qəbul imtahanı keçirilir

Bu gün Azərbaycan Dövlət İqtisad Universitetində SABAH qruplarına qəbul imtahanı keçirilir.

Təhsil Nazirliyin elm və ali təhsil şöbəsinin sektor müdiri Sülhəddin Gözəlov APA-ya açıqlamasında bildirib ki, SABAH qruplarına daxil olmaq üçün ərizə qəbulu mayın 12-dan iyunun 15-dək aparılıb və bu müddət ərzində imtahanda iştirak etmək üçün 53 ixtisas üzrə 2500-dən çox tələbə qeydiyyatdan keçib.

Onun sözlərinə görə, imtahan Dövlət İqtisad Universiteti ilə yanaşı, Naxçıvan Dövlət Universitetində də təşkil olunub və orada təxminən 100-ə yaxın tələbənin biliyi yoxlanılacaq. Hər iki binada imtahan eyni vaxtda - saat 10:00-da başlayıb və 1,5 saat ərzində davam edəcək.

Tələbələr imtahanda ingilis dili və məntiqdən hər biri 25 sual olmaqla ümumi 50 sualı cavablandırmalıdır. Hər bir test sualı 1 balla qiymətləndirilir və səhv cavablar düz cavabları ixtisar etmir. İmtahanın nəticələri emal olunduqdan sonra 1 həftə ərzində elan olunacaq.

Nəticələr Təhsil Nazirliyinin rəsmi internet səhifəsində və sabah.edu.az saytında yerləşdiriləcək.

İmtahan nəticələrinə əsasən, hər bir ixtisas üzrə yüksək bal toplayan 25 nəfər müsahibəyə buraxılacaq. Hər iki mərhələdən-test imtahanı və müsahibədən keçən tələbələr təhsillərini II kursdan ixtisaslarına uyğun olaraq SABAH qruplarının yaradıldığı baza ali təhsil müəssisələrində davam etdirəcəklər.

Qeyd edək ki, bu ildən ali təhsil sistemində yeni yaradılacaq “SABAH” qrupları savadlı, bacarıqlı və hazırlıqlı tələbələrdən təşkil ediləcək.

“SABAH” qrupları ölkədə müasir tələblərə cavab verən gənclərin hazırlanmasına böyük təkan verəcək. İlk olaraq növbəti tədris ilində 1300 tələbə II kursdan SABAH qruplarında təhsil ala biləcək. Aztəminatlı ailələrdən olan tələbələr yataqxana və yeməklə təmin olunacaq.