Azərbaycanda 1 milyon 281 min 712 nəfər əmək pensiyası alır

2014-cü ilin 1 aprel tarixinə olan məlumata görə, respublika üzrə əmək pensiyası alan şəxslərin sayı 1 milyon 281 min 712 nəfər təşkil edir. Dövlət Sosial Müdafiə Fondunun ictimaiyyətlə əlaqələr sektorundan Lent.az-a verilənə xəbərə görə, yaşa görə əmək pensiyası alanların sayı 787 min 680 nəfər, əlilliyə görə əmək pensiyası alanların sayı 356 min 188 nəfər, ailə başçısını itirməyə görə əmək pensiyası alanların sayı isə 137 min 844 nəfərdir. Bu da müvafiq olaraq ümumi pensiyaçıların sayına nisbətdə 61,5 faiz, 27,7 və 10,8 faiz təşkil edir.

2006-cı ilin 1 yanvar tarixinə əmək pensiyalarının orta aylıq məbləği 29,8 manat təşkil edirdisə, 2014-cü ilin 1 aprel tarixinə 171,7 manat olub.

Hazırda yaşa görə əmək pensiyasının orta aylıq məbləği 189,6 manat, əlilliyə görə 148,9 manat, ailə başçısını itirməyə görə isə 128,2 manatdır.

2014-cü ilin 1 aprel tarixinə əmək pensiyası alanların tərkibində qadınların sayı 773 min 113 nəfər, kişilərin sayı isə 508 min 599 nəfər olub.

Həmçinin əmək pensiyası alanların tərkibində işləyənlərin sayı 2014-cü ilin 1 aprel tarixinə 129 591 nəfərdir.