AMEA-nın televiziyasına dair müzakirələr aparılıb

Azərbaycan Milli Elmlər Akademiyası (AMEA) Rəyasət Heyətinin Mərkəzi Aparatının informasiyalaşdırılmasına dair fəaliyyət planının müzakirəsinə həsr olunmuş iclas keçirilib. Bu barədə Lent.az-a AMEA-dan məlumat verilib.

AMEA-nın akademik-katibi, İnformasiya Texnologiyaları İnstitutunun direktoru Rasim Əliquliyevin rəhbərliyi ilə keçirilən iclasda institutun bir sıra əməkdaşları, AMEA RH-nin elmi katibi, filologiya üzrə fəlsəfə doktoru Gülarə Əmirova, AMEA RH Mərkəzi Aparatının Ümumi şöbəsinin rəisi Sevinc Həsənova iştirak ediblər.

Akademiyada həyata keçirilən yeni islahatlardan danışan R. Əliquliyev bildirib ki, RH Mərkəzi Aparatının informasiyalaşdırılmasına dair Fəaliyyət Planı çərçivəsində görülən işlərin yekunlaşdırılması üçün zəruri tədbirlər həyata keçirilməlidir.

İclasda İTİ-nin baş mühəndisi, texnika üzrə fəlsəfə doktoru Rəşid Ələkbərov RH-nin struktur bölmələrinin fəaliyyətinin İT əsasında yenidən qurulması, elektron sənəd dövriyyəsi sisteminin işlənməsi, www.science.gov.az veb-portalının yenidən qurulması, AMEA-nın “ElmTV” İnternet televiziya kanalının yaradılması ilə bağlı işlərin icra vəziyyəti haqqında ətraflı məlumat verib.