Ali Hərbi Məktəblərə qəbul aparılır

Dövlət Sərhəd Xidmətinin Akademiyasına da qəbul elan edilib

Tələbə Qəbulu üzrə Dövlət Komissiyası (TQDK) Dövlət Sərhəd Xidməti Akademiyasına və Azərbaycan Ali Hərbi Məktəblərinə qəbul elan edib.

TQDK-nın mətbuat xidmətindən Lent.az-a verilən məlumata görə, Dövlət Sərhəd Xidməti Akademiyasına müsabiqə həmin ali məktəbin müraciətinə əsasən elan olunub.

Müsabiqədə I ixtisas qrupu üzrə test imtahanında iştirak etmiş və ümumi balı 250 və daha yüksək olan abituriyentlər iştirak edə bilərlər. Müsabiqədə iştirak etmək istəyənlər iyulun 31-dən avqustun 6-dək Dövlət Sərhəd Xidməti Akademiyasına müraciət etməlidirlər.

TQDK Müdafiə Nazirliyinin müraciətinə əsasən Azərbaycan Respublikasının Ali Hərbi Məktəblərinə qəbul olmaq istəyənlər üçün müsabiqə elan edib. Müsabiqədə I, II və III ixtisas qrupları üzrə mülki ali məktəblərə keçirilən test imtahanlarında iştirak etmiş və ümumi balı 150 və daha yüksək olan yalnız Azərbaycan bölməsinin abituriyentlər iştirak edə bilərlər. Müsabiqədə iştirak etmək istəyənlər sənədlərini iyulun 31-dən avqustun 6-dək Heydər Əliyev adına Azərbaycan Ali Hərbi Məktəbinə təqdim etməlidirlər.

Hər iki ali məktəbə müsabiqə nəticəsində qəbul olanlar mülki ali məktəblərin müsabiqəsində iştirak etmək hüququnu itirirlər.