Səhər saat 5-ə qədər metro sərnişinləri evə çatdırılıb

Futbol üzrə UEFA Avropa liqasının final qarşılaşmasının Bakı Olimpiya Stadionunda keçirilməsi ilə əlaqədar Bakı metropoliteni oyunun keçirildiyi 29 may və 30 maya keçən gecə gücləndirilmiş iş rejimində çalışıb.

Bu barədə Lent.az-a qurumun mətbuat xidmətindən məlumat verilib.

Bildirilib ki, paytaxt sərnişinləri və qonaqlarının təhlükəsizliyini, rahat hərəkətini təmin etmək məqsədilə əlavə işçi qüvvəsi və texniki vasitələr cəlb olunub. Olimpiya stadionunda oyunu canlı izləyən tamaşaçıların metropolitendən istifadəsi tam şəkildə təmin edilib. Metro stansiyaları saat 04:00-a qədər sərnişinlərin girişinə açıq olub. Səhər saat 05:00-a kimi bütün sərnişinlər mənzil başına çatdırılıb.

Həmçinin qeyd edilib ki, may ayının 27-dən turistlərin daha sıx istifadə edəcəyi ehtimal olunan stansiyalarda 30 könüllü paytaxtın qonaqlarına yüksək səviyyədə mədəni xidmət göstərib. Müvafiq qaydalarla təlimatlandırılan və hər biri yaddaş kitabçaları ilə təmin olunan metropoliten könüllüləri üzərinə “Ask me” (“Məndən soruş”) yazılan xüsusi geyimlərdə olublar.