“Qaçqınkom” Gəncədə məcburi köçkünün intihar cəhdinə münasibət bildirdi

Qaçqın və Məcburi Köçkünlərin İşləri üzrə Dövlət Komitəsi Gəncədə intihara cəhd edən məcburi köçkünlə bağlı rəsmi məlumat yayıb. Komitənin mətbuat xidmətindən Lent.az-a verilən məlumata görə, hazırda Gəncə şəhəri ərazisində 1500 ailəlik yeni salınmış şəhərciyə məcburi köçkünlərin köçürülməsi aparılır. Bu günə kimi 960 ailə köçürülüb.

Köçürülmə prosesi Komitənin, Kəlbəcər rayon və Gəncə şəhər icra hakimiyyətlərinin, Kəlbəcər rayon və Gəncə şəhər polis şöbələrinin nümayəndələrinin və məcburi köçkün icmalarının iştirakı ilə xüsusi yaradılmış komissiya tərəfindən mənzillərin püşkatma yolu ilə ailə tərkibinin sayı nəzərə alınmaqla yüksək şəffaflıq şəraitində həyata keçirilir. Hazırda işlər uğurla davam etdirilir.

“Lakin təəssüflər olsun ki, köçürmə zamanı bəzi məcburi köçkünlər köçürülən obyektdə yaşamadığından, ev almaq üçün sonradan gəlib həmin obyektlərə müxtəlif qanunsuz yolla yerləşərək, hədə-qorxu gəlməklə ev almaq istəyirlər.

Komitənin mətbuat xidməti bir daha məcburi köçkünlərin nəzərinə çatdırır ki, köçürülmə zamanı bu cür hallara yol verməsinlər və bu sahədə işlər tam nəzarətdə olduğundan bütün neqativ halların qarşısı alınacaq”.