“Atletiko” futbolçuları “Land of Fire” köynəklərini imzalayacaqlar

30 yanvar - 3 fevralda İspaniyanın Madrid şəhərində keçiriləcək "FİTUR 2013" beynəlxalq turizm sərgisində Azərbaycan Respublikası mədəniyyət və turizm naziri Əbülfəs Qarayevin rəhbərliyi altında nümayəndə heyətinin iştirakı nəzərdə tutulub. Nazirliyin mətbuat xidmətindən Lent.az-a verilən məlumata görə, adıçəkilən sərgidə respublikamızın turizm imkanlarını əks etdirən 51 kv.m sahədə lövhə quraşdırılıb.

Lövhədə "Şahdağ" qış-yay turizm kompleksi və "Bakı Futbol Klubu" üçün də yer ayrılıb. Sərgiyə gələn ziyarətçi və iştirakçılara paylanması üçün ingilis və ispan dillərində müxtəlif növ reklam-çap məhsulları, eləcə də digər təbliğat materialları hazırlanıb.

Həmçinin "Bakı Futbol Klubu"nun dəstəyi ilə sərgi günlərindən birində Madrid şəhərini təmsil edən "Atletiko” futbol klubunun məşhur futbolçularından bir neçəsinin stendimizdə sərgi ziyarətçiləri üçün özündə "Land of Fire" yazısını əks etdirən futbol formalarının üzərində imza atmalarının təşkil edilməsi nəzərdə tutulur.