“Abituriyent” jurnalının 4-cü sayı nəşr olunub

Tələbə Qəbulu üzrə Dövlət Komissiyası “Abituriyent” jurnalının 4-cü sayını nəşr edərək abituriyentlərin istifadəsinə verib. Bu barədə Lent.az-a TQDK-dan məlumat verilib. Jurnalda bir sıra materiallar əksini tapıb. Abituriyentlər adıçəkilən jurnalı almaqla 2014/2015-ci tədris ili üçün Azərbaycan Respublikasının ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi haqqında elan, Qabiliyyət İmtahanı Komissiyaları üzrə ali təhsil müəssisələrinin xüsusi qabiliyyət tələb edən ixtisasları üçün müsabiqə şərtləri, “Abituriyentin elektron ixtisas seçimi ərizəsi”nin doldurulma qaydası, qəbul imtahanlarının keçiriləcəyi bölgə (imtahan) mərkəzləri haqqında məlumat, ali təhsil müəssisələrinə və tam orta təhsil bazasından orta ixtisas təhsili müəssisələrinə keçirilən qəbul imtahanları ilə bağlı vətəndaşların müraciətlərinə baxılması qaydaları, 2014/2015-ci tədris ili üçün Azərbaycan Respublikasının ali təhsil müəssisələrinə qəbul aparılan ixtisaslar, 2014/2015-ci tədris ili üçün ali təhsil müəssisələrinin bakalavriat səviyyəsinə dövlət sifarişi ilə tələbə qəbulunun proqnozu ilə tanış ola bilərlər.