8 gənc alim AMEA-nın Fəxri Fərmanı ilə təltif olunacaq

Azərbaycan Milli Elmlər Akademiyası (AMEA) Rəyasət Heyətinin “Gənclər üçün Prezident Mükafatı”na təqdim etdiyi 8 gənc alim AMEA-nın Fəxri Fərmanı ilə təltif olunacaq. AMEA Rəyasət Heyətinin İctimaiyyətlə əlaqələr şöbəsindən Lent.az-a verilən məlumata görə, bu barədə qərar RH-nin iclasında qəbul olunub. Onlar Riyaziyyat və Mexanika, Fizika, Geologiya, Botanika və Ədəbiyyat institutlarının, həmçinin Azərbaycan Tibb Universitetinin elmi nəticələri ilə fərqlənən gəncləridir.

İclasda AMEA-nın prezidenti, akademik Akif Əlizadə ölkə başçısı İlham Əliyevin “Gənclər üçün Prezident Mükafatı”nın təsis edilməsi haqqında” fərmanını xatırladıb və ölkədə gənclərin inkişafına dövlət qayğısını yüksək qiymətləndirib. Onun sözlərinə görə, AMEA-nın Fəxri Fərmanı ölkə başçısının gənclər siyasətinin qarşıya qoyduğu vəzifələrdən irəli gəlir. Gənclərin təltif olunmasında məqsəd elm sahəsində intellektual və yaradıcı potensialı ilə fərqlənən gənc alimləri üzə çıxarmaq, fəaliyyətini qiymətləndirmək, onları daha geniş miqyasda elmi və elmi-təşkilati işlərə cəlb etməkdir. Bu, AMEA-nın kadr hazırlığı siyasəti çərçivəsində həyata keçirdiyi kompleks tədbirlərdəndir.