Uşaqlar nə vaxt peyvənd olunacaq? - Azərbaycanlı alimdən AÇIQLAMA

“Qarşıdakı aylarda uşaqlara tətbiq olunacaq peyvənd istehsalı vasitəsilə pandemiya ilə mübarizənin yeni mərhələsinə qədəm qoyulacaq”.

Bu fikirləri Lent.az-a açıqlamasında Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru, azərbaycanlı alim Nuran Abdullayev deyib.

Azərbaycanlı alim bildirir ki, artıq bu istiqamətdə də kifayət qədər elmi tədqiqatlar işlənilərək hazırlanıb:

“Peyvənd istehsal edən böyük şirkətlər bu elmi tədqiqatlarla bağlı artıq önəmli mərhələyə çatırlar. Bunlardan "BioNtec", "Moderna", "Astrazeneca" peyvəndlərinin uşaqlara tətbiq oluna biləcəyi istisna edilmir. Bu peyvəndlərdən "BioNtec", "Moderna" 12 yaşdan yuxarı "Astrazeneca" isə 5 yaşdan yuxarı uşaqlar üçün nəzərdə tutulub. Elmi tədqiqatların normal gedişlə davam edəcəyi təqdirdə, bu peyvəndlərin tətbiqinə yay və payız aylarında başlanılması gözlənilir. Uşaqlara tətbiq olunan peyvəndlərdə yüksək effektivlik müşahidə olunarsa, o zaman hətta yayda istifadəsinə başlanıla bilər. Bu da həqiqətən pandemiya ilə mübarizədə böyük bir nailiyyət və uğur deməkdir. Çünki bildiyimiz kimi, uşaqlar da böyüklər qədər virusun yayılmasına səbəb olurlar, bu da çox önəmli elmi faktdır".

Nuran Abdullayev qeyd edir ki, dünya peyvənd tətbiqi ilə pandemiyaya qarşı mübarizənin yeni mərhələsinə keçib və artıq dünyanın dörd bir yanında peyvəndləmə aparılır:

“Peyvəndləmə sahəsində rəqabət yeni yayılan virus mutasiyalarına qarşı peyvəndlərin daha effektivliyi və təsiredici gücə malik olması istiqamətində aparılır. Ona görə də bu gün təhlükəsizliyi və effektivliyi daha yüksək olan vaksinlərə tələbatın artması da gözləniləndir. Hazırda 4 böyük Çin peyvəndinin elmi tədqiqatları aparılır.”

Alim Azərbaycanda tətbiq olunan "Sinovac" şirkətinin "CoronaVac" peyvəndi üzərində uşaqlarda tətbiqi üçün tədqiqat aparıldığını, rəsmi olaraq oktyabr ayında başlanılan bu tədqiqatın bu ayın sonunda bitəcəyini bildirir:

“Bu peyvənd 3-17 yaşlı uşaqlar üçün nəzərdə tutulacaq. Digər Çin istehsalı olacaq peyvəndlərdən BIBP BBIBP-ın CorV peyvəndi 3 yaşdan yuxarı uşaqlara və Cansinonun Ad5-nCoV peyvəndi isə 6 yaşdan yuxarı uşaqlara nəzərdə tutulur".