Saatı 1 manat olan parklanma qiyməti nəyə əsasən hesablanıb? - AÇIQLAMA

Son günlərdə ölkədə parklanma qiymətləri ilə bağlı məsələlər insanlar arasında müzakirə mövzusuna çevrilib. Hazırda insanların böyük bir hissəsi parklanma qiymətlərinin bahalı olmasından şikayətlənir. Belə ki, şəhərin bəzi ərazilərində parklanma qiyməti saatı 30-70 qəpik təşkil edirsə, əksər ərazilərində isə saatı 1 manat təşkil edir.

Maraqlıdır, parklanma qiymətləri nəyə əsasən tərtib olunur?

Məsələ ilə bağlı Azərbaycan Yerüstü Nəqliyyat Agentliyinə müraciət etdik.

Qurumun mətbuat katibi Tural Orucov Lent.az-ın sorğusuna cavab olaraq bildirib ki, “Nəqliyyat vasitələrinin parklanmasına görə ödənişin məbləği”nin təsdiq edilməsi haqqında Nazirlər Kabinetinin Qərarına əsasən, Bakı şəhəri üzrə 4 parklanma zonası müəyyən edilib və ödənişlər hər zonaya uyğun tətbiq edilir.

Onun sözlərinə görə, “İçərişəhər” Dövlət Tarix-Memarlıq və “Qala” Dövlət Tarix-Etnoqrafiya qoruqlarının ərazisi istisna olmaqla, Bakı şəhərinin mərkəzində parklanmanın 1 saatı 1 manat, digər zonalarda müvafiq olaraq 1 saatı 70, 40, 30 qəpik məbləğində müəyyən edilib:

“Gəncə və Sumqayıt şəhərlərinin mərkəzi hissələrində parklanmanın 1 saatı üçün 40 qəpik, digər ərazilər üçünsə 20 qəpik ödəniş edilməsi nəzərdə tutulub. Ödənişli parklanma yalnız parklanmanın sıxlığa səbəb olduğu və əlçatanlığın təmin edilmədiyi ərazilərdə tətbiq ediləcək. Şəhərin hansısa hissəsində parkinqə olan tələbat azdırsa, bu ərazidə qiymət tənzimlənməsi tətbiq edilməyəcək. “Yol hərəkəti haqqında” Qanuna əsasən, ödənişli parklanma yerlərində nəqliyyat vasitələrinin 15 dəqiqəyədək parklanması üçün ödəniş tələb olunmur. Nəqliyyat vasitəsi 15 dəqiqədən artıq parklanarsa, ödəniş tam məbləğdə hesablanır. Nəqliyyat vasitələrinin parklanması üçün saat 22:00-dan saat 07:00-a qədər, eləcə də həftənin bazar günləri ödəniş tələb olunmur”.

Nəqliyyat eksperti Aslan Əsədov isə bildirib ki, parklanma qiymətlərinin hesablanması əvvəlki qaydalara və ənənəvi üsullara əsasən hesablanır.

Onun sözlərinə görə, bu proses iqtisadçılar, mütəxəssislər tərəfindən hazırlanır:

“Burada qiymət xarici praktika, ümumi ərazinin qiymətləndirilməsi, 1 kvadrat metrə düşən avtomobillərin sayı, həmin ərazidə yerləşən müəssisələrin rentabelinə əsasən hesablanır”.