Nizami Tibb Mərkəzi “Azərsutikinti” xəstəxanasının bağlanması və oradakı tibb işçilərinin işsiz qalması ilə bağlı məlumatlara aydınlıq gətirib.
Mərkəzdən Lent.az-a bildirilib ki, sözügedən xəstəxananın hemodializ şöbəsi yerində saxlanılmaqla, 9 stasionar cərrahi əməliyyatla məşğul olan həkim-mütəxəssis 4 cərrah, 3 həkim-ginekoloq, 2 lor həkimi fəaliyyətini Sabunçu Tibb Mərkəzində davam etdirməsi nəzərdə tutulub. Digər tibbi heyət, o cümlədən nevroloji, terapiya, qəbul, reanimasiya, laboratoriya şöbələri Nizami Tibb Mərkəzinin yeni binasına köçürüləcək və fəaliyyətlərini orada davam etdirəcəklər.
Qeyd edək ki, sözügedən məsələlər ştat cədvəlinin tərtibatı zamanı nəzərə alınıb.
***
saat 17:50
Sosial şəbəkələrdə Bakıda fəaliyyət göstərən “Azərsutikinti” xəstəxanasının bağlanması ilə bağlı məlumatlar yayılıb.
Lent.az-ın məlumatına görə, yayılan məlumatlarda bildirilir ki, sözügedən xəstəxananın bağlanması nəticəsində onlarla tibb işçisi işsiz qalıb.
Sosial şəbəkələrdə xəstəxananın bağlanmasına etiraz edən həkimlərin də videomüraciəti yayılıb.
“Azərsutikinti” xəstəxanasından isə Lent.az-a bu barədə yayılan məlumatlar yalan olduğu bildirilib.