Qaraqurtlunun qaranlıq günləri: “Naqillər sallanır, dayaqlar çürüyüb, meh əsən kimi...”

“15 ildir ki, bu kənddə yaşayıram. Bu illər ərzində həmişə qaz və işıq problemi olub. Sənədlərdə bizim bu yaşayış yerlərimiz qazla təmin olunmuş göstərilir, amma fakt olaraq qaz yoxdur”.

Xaçmazın Qaraqurtlu kənd sakinləri uzun müddətdir qaz və elektrik enerjisinin olmamasından şikayətçidilər. Onlar qəzalı vəziyyətdə olan elektrik dayaqları və xətlərinin yenilənəcəyi günü gözləyirlər. Yaşadıqları yerin sosial problemlərindən təngə gəldiklərini deyən kənd sakini Tərlan Məhərrəmov, bu vəziyyətin onların yaşayışını çətinləşdirdiyini də bildirib:

“Kəndin yarısı qazla təmin olunub, qalan hissəsi isə yox. Bax bura yol çəkilib. Hə, bu yol çəkilməzdən əvvəl qazı, işığı bizim tərəfə də çəksəydilər yaxşı olardı”.

Kəndin digər sakini Elşən Heybətov da qonşusunun sözlərini təsdiqləyir:

“Bax, yolun o biri üzündən, haradasa 20 metr aralıdan qaz xətti keçir. Amma bizdə qaz yoxdur. Bu nə vaxta qədər belə olacaq? İllərdir bu əziyyəti çəkirik. Müraciət də edirik, deyirlər ki, sənədlərdə qazla təmin olunmusunuz. Bizə söz verdilər ki, qaz çəkiləcək. Amma 6 ay keçib hələ də bir xəbər yoxdur. Kəndin 40-50 evi bu əziyyəti çəkir. Qarşıdan qış gəlir. Biz yenə əvvəlki illərdəki kimi soyuqda qalacağıq”.

Problem təkcə qazla bitmir. Kənd sakinlərini narahat edən digər ciddi problem işıqsızlıqdır. Elə qaz kimi işıq da yolun digər tərəfində mövcuddur. Sakinlər naqillər vasitəsi ilə evlərinə işıq çəksələr də, dəyişən heç nə yoxdur. Kənd sakini Tərlan Məhərrəmov deyir ki, naqillərin yöndəmsiz çəkilməsi qəzalı vəziyyət yaradır:

“Elektrik xətləri pis vəziyyətdədir. Bir balaca meh olanda, yağış yağanda işıqlar sönür. Hələ güclü külək, leysan yağışlar yağanda iflic olmasını demirəm. Saatlarla, günlərlə işığın yanmasını gözləməli oluruq. İşıqlar o qədər zəifdir ki, adi fen, yaxud da başqa bir elektrik əşyasından istifadə etmək istəyəndə tamamilə zəifləyir, ya da sönür. Bir ildir ki, gətirib yolun kənarına transformator qoyublar. Amma kəndi işıqla təmin etmək üçün onu hazır vəziyyətə gətirən yoxdu. Yaranmış duruma görə sözümüzü kimə, haraya deyəcəyimizi də bilmirik”.

Sabah burda bir adamı cərəyan vursa, buna kim cavab verəcək?

Bu sual artıq uzun müddətdir ki, Qaraqurtlu kənd sakinlərini narahat edir. Kəndin təxminən 50-ə yaxın evini əhatə edən və bərbad vəziyyətdə olan elektrik xətləri sakinlərin həyatı üçün əsl təhlükə mənbəyidir. Kənd sakini Elşən Heybətov deyir ki, işıq dirəkləri olduqca etibarsız, naqillər isə istismara yararsızdır:

"Uşaqları az qala bir neçə dəfə cərəyan vura. Naqillə sallanır, dayaqlar pis gündədir, əksəri çürüyüb. Naqillər havada adam boyundan da aşağı hündürlükdən keçir. Naqillərin əksəriyyəti də, izolə olunmadan bir-birinə bərkidilib. Vaxtı-vaxtında işıq pulunu ödəsək də, şikayətimizə baxan yoxdur. Uşaqlar məktəbə gedəndə arxalarınca baxıram ki, naqil qırılıb başlarına düşməsin. Heç kim də gəlib bununla maraqlanmır".

Problemlə bağlı Lent.az-a danışan Xaçmaz Regional Elektrik Şəbəkəsinin rəisi Firudin Ağaxanov bildirilib ki, Qaraqurtlu kəndinin sözügedən ərazisi yeni yaşayış massividir:

“Problemin aradan qaldırılması üçün qurum tərəfindən layihə hazırlanıb. Yaxın günlərdə həmin yaşayış massivlərində elektrik naqillərinin və dayaqların dəyişdirilməsi prosesi mərhələli şəkildə həyata keçiriləcək”.

"Azərişıq" ASC-nin mətbuat xidmətindən Lent.az-a verilən məlumata görə, deyilən nöqsanların aradan qaldırılması üçün yenidən qurulma layihəsini gözləmək lazımdır. Layihəyə görə, təkcə Xaçmaz rayonunun Qaraqurtlu kəndinin deyil, bu problemin mövcud olduğu ölkənin digər rayon və kəndlərində də işıq sistemi yenisi ilə əvəz olunacaq. Transformatorlar və bütün xətlər yenilənəcək. Amma bütün bunlar sıra ilə olmalıdır.