ADU-da 3 günlük seminar yekunlaşdı

Bu gün Azərbaycan Dillər Universitetinin (ADU) İnformasiya Resurs Kompleksində (İRK) TEMPUS layihəsi çərçivəsində “Azərbaycanda yazılı və şifahi tərcümənin tədrisində islahatlar” mövzusunda seminar yekunlaşdı. Lent.az-ın ADU-nun mətbuat xidmətindən aldığı məlumata görə, seminarda tədris işləri üzrə prorektoru Natiq Yusifov, Beynəlxalq əlaqələr üzrə prorektoru Jalə Qəribova, Tərcümə fakültəsinin dekanı Vilayət Hacıyev iştirak edib.

Məlumata görə, seminarda tədris metodologiyası, qiymətləndirmə meyarları haqqında, eləcə də ADU ilə Azərbaycan regionlarındakı universitetlərlə müəllim-tələbə mübadiləsi ətrafında müzakirələr aparılıb. Daha sonra İtaliyanın Milan Universitetinin əməkdaşı öz tədris proqramları haqqında ətraflı məlumat verib.

Qeyd edək ki, TEMPUS layihəsi çərçivəsində “Azərbaycanda yazılı və şifahi tərcümənin tədrisində islahatlar” mövzusunda seminar 3 gün davam edib. Seminarın keçirilməsinin əsas məqsəd isə dil dərslərinin keçirilmə mexanizmini müəyyən etmək və tədris planını hazırlamaqdan ibarətdir.