Yaşlı müəllimlər təqaüdə göndəriləcək

Hazırda Bakı məktəblərində 4274 təqaüd yaşlı müəllim pedaqoji fəaliyyətini davam etdirir

Yaşlı müəllimlərin təhsil müəssisələrində çalışmasına yaxın vaxtlarda məhdudiyyət qoyulacaq. Artıq bu istiqamətdə müəyyən hazırlıqlara da başlanıb.
Təhsil Nazirliyindən Lent.az-a bildiriblər ki, artıq bir sıra şəhər və rayonlarda pensiya yaşı çatmış müəllimlərin siyahısı dəqiqləşdirilir. Amma yaşlı müəllimlərin məktəblərdə işləməməsi üçün yaş həddi hələ müəyyənləşməyib.

Nazirlikdə bildirirlər ki, bu məsələ Milli Məclisin son sessiyasında qəbul olunmuş “Təhsil haqqında” yeni qanun tələbləri çərçivəsində həll ediləcək. Lakin konkret yaş məhdudiyyəti qoyulsa belə, bu, hamıya şamil edilməyə bilər. Belə təklif var ki, pensiya yaşı çatmış, lakin fiziki və zehni qabiliyyətində qüsurları olmayan müəllimlər özlərinin istəyi olmadan işdən çıxarılmasın.

Xatırladaq ki, hazırda təkcə Bakı məktəblərində 4 min 274 müəllim təqaüd yaşındadır. Paytaxtdakı təhsil müəssisələrində çalışan müəllimlərin ümumi sayı isə 33 min 408-dir. Onların 3 min 641 nəfəri kişi, 29 min 767 nəfəri isə qadın müəllimlərdir.

Elxan SALAHOV