Tələbə qəbulu planında 1554 yer boş qalıb

Boş plan yerləri uğrunda 3500-dən çox abituriyent mübarizə aparacaq

Bu il ali məktəblərə tələbə qəbulu üçün ayrılmış 29030 plan yerinə 27476 abituriyent qəbul olunub. Qəbul planı 94,65 faiz yerinə yetirilib. Boş qalan plan yerlərinin ümumi sayı 1554-dür.

Lent.az-ın məlumatına görə, Tələbə Qəbulu üzrə Dövlət Komissiyasının sədri Məleykə Abbaszadə bu gün keçirdiyi mətbuat konfransında belə deyib. Onun sözlərinə görə, ali məktəblərin boş qalan yerlərinin siyahısı “Abituriyent” jurnalının 7-ci sayında dərc olunub. Həmin yerlərə ixtisas seçimi avqustun 7-dən 11-dək internet vasitəsilə aparılır.

Məleykə Abbaszadə bildirib ki, boş qalmış yerlərə əlavə qəbulda I ixtisas qrupu üzrə müsabiqədə 1091, II qrupda 590, III qrupda 1887, IV qrupda isə cəmi bir neçə abituriyent iştirak etmək hüququna malikdir. Onun sözlərinə görə, abituriyentlər elektron ərizədə ali məktəblərin boş qalan plan yerlərinin ixtisasları ilə yanaşı orta ixtisas məktəblərinin ixtisaslarının da kodlarını göstərə bilər.

İxtisas qrupları və bölmələr üzrə qəbul planı və qəbul olmuş abituriyentlərin say bölgüsü belədir:

İXTISAS QRUPU	Qəbul planı			Qəbul olunmuş abituriyentlərin sayı
İXTISAS QRUPU	Azərbaycan bölməsi	Rus bölməsi	Birgə müsabiqə aparılan ixtisaslar	Azərbaycan bölməsi	Rus bölməsi
I	6981	1018	719	7075	1190
II	4244	662	2425	5730	1011
III	6731	1080	1715	7813	1224
IV	1769	316	1370	3004	429