Meyvə bazarında bahalıq və kasadlıqdır - CƏDVƏL

Bu il Azərbaycanda kənd təsərrüfatı məhsulları bazarında bahalıq və kasadlıq müşahidə olunur. Regionlardan fərqli olaraq, paytaxt bazarlarında bahalıq özünü daha açıq şəkildə göstərir.

Lent.az-ın əməkdaşı “8-ci mikrorayon bazarı” və “Yaşıl bazar”da müşahidələr aparıb. Müşahidələr göstərir ki, ötən illə müqayisədə ən çox bahalaşan məhsullar arasında ərik, gilas, çiyələk, kartof, badımcan, lobya, bibər və digərləri var. Hazırda hər iki bazarda əriyin və gilasın qiyməti 3-4, çiyələk 2-3 manat arasında dəyişir. Hətta bazarlarda kiloqramı 5 manata olan gilasa da rast gəlmək olur.

Ötən illə müqayisədə bu il pomidorun da qiyməti xeyli bahadır. Amma növündən və keyfiyyətindən asılı olaraq, bazarlarda pomidorun qiyməti fərqlidir. Hazırda paytaxt bazarlarında ən ucuz – pomidor 1 manat 20 qəpik, ən yüksək qiymət isə 2 manat 50 qəpikdir.

Əsas mövsümi məhsulların qiyməti cədvəldə göstərildiyi kimidir:

Məhsulun adı	Ölçü vahidi	Qiymətlər
Ərik	kiloqram	3-4 manat
Çiyələk	kiloqram	2-3 manat
Gilas	kiloqram	3-5 manat
Pomidor (Zirə)	kiloqram	2 manat 50 qəpik
Pomidor	kiloqram	1 manat 50 qəpik - 2 manat
Xiyar	kiloqram	35-50 qəpik
Kartof (təzə)	kiloqram	50-70 qəpik
Kartof (köhnə)	kiloqram	1 manat
Soğan	kiloqram	50-70 qəpik
Lobya	kiloqram	80 qəpik - 1 manat
Badımcan	kiloqram	1 manat - 1 manat 20 qəpik
Alça	kiloqram	2 manat
Bibər	ədəd	20 qəpik
Alma (yerli)	kiloqram	1 manat 50 qəpik
Alma (xarici)	kiloqram	2 manat
Kök	kiloqram	50-70 qəpik
Limon	ədəd	30-40 qəpik

Daha bir problem. Bu ilki yaz-yay mövsümündə bazarda satılan meyvə–tərəvəzin aşağı keyfiyyətdə olması da diqqəti çəkir. Satıcılar bunu məhsulun yağış sularına daha çox məruz qalması ilə əlaqələndirirlər. Bu isə meyvə-tərəvəzin tez xarab olmasına, insanlarda zəhərlənmələrə və allergik reaksiyalara səbəb olur. Mütəxəssislər isə bildirirlər ki, məhsulun aşağı keyfiyyətdə olması, tez xarab olması və insan orqanizmində problemlər yaratmasının səbəblərindən biri də bəzi mövsümi məhsulların yetişdirilməsi zamanı aqrotexniki qaydalara əməl olunmaması və saxlama şəraitinin düzgün olmamasıdır.

Elxan SALAHOV