Rusiya universitetlərinə imtahanların nəticələri açıqlandı

Tələbə Qəbulu üzrə Dövlət Komissiyası (TQDK) 2010/2011-ci tədris ili üçün Rusiya Federasiyası Xarici İşlər Nazirliyinin Moskva Dövlət Beynəlxalq Əlaqələr İnstitutuna (Universitetinə) və Rusiya Federasiyasının digər ali təhsil müəssisələrinə qəbul olmaq istəyən Respublikası vətəndaşları üçün mayın 15-də keçirdiyi test imtahanının nəticələrini açıqlayıb.

TQDK-nın mətbuat xidmətindən Lent.az-a bildiriblər ki, Rusiyanın ali təhsil müəssisələrində təhsil almaq istəyən abituriyentlərdən I ixtisas qrupunda 15 nəfər, II ixtisas qrupunda 9 nəfər 300 və daha artıq bal toplayaraq müsabiqənin ikinci mərhələsinə buraxılıblar. III ixtisas qrupunda 4 nəfər, IV ixtisas qrupunda isə 9 nəfər 350 və daha artıq bal toplayaraq müsabiqənin ikinci mərhələsinə vəsiqə qazanıb.

Test imtahanı nəticəsində 300-dən yüksək bal toplayan I və II qrup abituriyentləri və 350-dən yüksək bal toplayan III və IV qrup abituriyentləri müsahibədə iştirak etmək üçün bu gün TQDK-ya dəvət olunub.

Elxan SALAHOV