CAR nümayəndələri Bakı Ali Neft Məktəbində olublar

Cənubi Afrika Respublikasının milli neft şirkəti “PetroSa”-nın icraçı direktoru Nosizve Nokve və Enerji Nazirliyinin direktor müavini Tsetiso Maqubela, Xarici İşlər Nazirliyinin Qərbi Avropa üzrə Beynəlxalq Əməkdaşlıq İdarəsinin direktoru Novetu Luti, ölkənin Türkiyəyə və Azərbaycandakı səfirinin müşaviri Soraya Cakobs və eyni zamanda CAR-dakı səfirimiz Elxan Poluxov Bakı Ali Neft Məktəbində olublar. Bu barədə Lent.az-a ali məktəbin ictimaiyyətlə əlaqələr şöbəsindən məlumat verilib.

Bakı Ali Neft Məktəbinin rektoru Elmar Qasımov Dövlət Neft Şirkətinin Azərbaycanda və ölkədən kənarda həyata keçirdiyi layihələr barədə, eyni zamanda Bakı Ali Neft Məktəbi barədə qonaqlara ətraflı məlumat verib.

Qonaqlar qısa vaxt ərzində Bakı Ali Neft Məktəbinin əldə etdiyi nailiyyətləri yüksək qiymətləndirdiklərini qeyd edərək, onunla müxtəlif təhsil layihələri çərçivəsində əməkdaşlıq etməyə və CAR-ın tanınmış Pritoria Universiteti və digər texniki ali məktəbləri ilə əlaqələr qurulması üçün dəstək verməyə hazır olduqlarını bildiriblər.

Görüşün sonunda E. Qasımov qonaqlara Bakı Ali Neft Məktəbinin adından hədiyə vermiş və xatirə şəkli çəkdirilib.